Eshqandaı amal oılap, shıelenis jasamaımyn jáne prezıdent ornynan tynysh ketemin - Roza Otynbaeva
ShKEK. 22 tamyz. QazAqparat /Arnur Rahymbekov/ - Qyrǵyzstan Prezıdenti Roza Otynbaeva Osh qalasyna jasaǵan saparynyń barysynda jergilikti baspasóz ókilderine eldegi saılaýaldy naýqannyń barysy týraly aıtty.
«Bıyl prezıdent saılaýyn ádil ári shynaıy ótkize alamyz dep oılaımyn», - dep málim etti R.Otynbaeva.
Jýrnalısterdiń ákimshilik resýrsty paıdalaný múmkindigi men el premer-mınıstri Almazbek Atambaevtyń saılaý aldynda demalysqa ketýi týraly qoıǵan saýaldaryna qatysty Qyrǵyz Respbýlıkasynyń prezıdenti saılaý kezinde ákimshilik resýrsty paıdalanbaýǵa bolatyn tájirıbe bar ekendigin atap ótti.
«Ótken jylǵy parlament saılaýy óte joǵary uıymdastyrýshylyq deńgeıde jáne ákimshilik resýrsty paıdalanbaı-aq ótti. Buny barlyǵy moıyndaǵan. Premer-Mınıstr zańǵa sáıkes saılaýǵa qatysýy úshin demalysqa shyǵatynyn resmı málim etti. Al prezıdenttikke úmitkerlerdiń sanyna toqtalatyn bolsaq, meniń oıymsha, árbir adam óz múmkindigin shynaıy túrde baǵalaı alý úshin qatań túrde shekteý qoıylý kerek. Jáne de ótinish bildirgen kandıdattardyń sany azaıdy dep oılaımyn, bireýi memlekettik tilden emtıhan tapsyra almasa, bireýi qajetti qol jınamaýy yqtımal, biriniń qarjylaı múmkindigi kelmeıdi»,- deıdi R.Otynbaeva.
Jáne de ol táýelsiz Qyrǵyzstan tarıhynda alǵash ret bılikti beıbit jolmen, zań aıasynda tapsyrýǵa múmkindik týyp otyrǵanyn jetkizdi.
«Men jasyryn jolmen eshqandaı da amal oılap, shıelenis jasamaımyn jáne óz ornymnan tynysh ketemin», - deıdi ol.
