Esh jeńilmegen Aıdos Erbosynuly úsh tıtýlyn sátti qorǵady
NUR-SULTAN. QazAqparat – Aýstralııanyń Sıdneı qalasyndaǵy ICC Exhibition Centre arenasynda ótip jatqan boks keshinde qazaqstandyq talantty boksshy Aıdos Erbosynuly kezekti ret rıngke shyqty, dep habarlaıdy QazAqparat Sports.kz-ke silteme jasap.
27 jastaǵy Aıdos jergilikti Rokkı Ierkıchpen aıqasty. Ekinshi orta salmaqta on raýnd ótken jekpe-jekte tóreshiler 99-91, 98-92, 98-92 esebimen jeńisti Aıdosqa berdi. Sóıtip, qazaqstandyq kásipqoı WBO Global, WBA Inter-National jáne WBC Asia Continental tıtýldaryn qorǵap qaldy.
Aıdos osymen 12-ret jeńiske jetti (sonyń segizi - nokaýt). Al 17 jeńisi (13 nokaýty) bar 31 jastaǵy Ierkıch ekinshi ret jeńildi.
Osy boks keshinde taǵy bir qazaqstandyq boksshy óner kórsetti. Jartylaı orta salmaqta Nursultan Jańabaev (8-0, 5 KO) ta tóreshilerdiń sheshimimen aýstralııalyq Stıva Gagony (11-1, 4 KO) jeńip, WBA Inter-Continental, WBO Oriental jáne IBF Pan Pacific tıtýldaryn qorǵady.
