Eset Qýanov Astanadaǵy týrnırde qola júlde aldy

ASTANA. KAZINFORM — Astanada ótip jatqan dzıýdodan Qazaqstan Barysy Grand Slam týrnıriniń ekinshi jarys kúni, 10 mamyrda Eset Qýanov (73 keli) qola medal jeńip aldy. Qazaqstandyq balýan 3-oryn úshin saıysta grýzııalyq Mıheılı Bahbahashvılıden basym tústi.

Eseı Qýanov qazirge deıin 2019, 2021 jyldarda Azııa kýbogynda top jarǵan. 
Bul — Qazaqstan quramasynyń qorjynyndaǵy besinshi medal.

Aıta ketsek, jarystyń alǵashqy kúni, 9 mamyrda Ǵusman Qyrǵyzbaev (66 keli) pen Talǵat Orynbasar (60 keli) kúmis alsa, Aman Baqytjan jáne Maǵjan Shamshadın qola júldege qol sozdy.

Búgin sondaı-aq 81 kelige deıingi salmaqta Abylaıhan Jubanazar qola júlde úshin kúresetin bolady.

Atalǵan jarys nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngilerde upaılar bólinedi. Atap aıtqanda, І oryn úshin — 1 myń, kúmis júldegerge — 700, al qola medal alǵanǵa 500 upaı esepteledi.

Elordadaǵy Jaqsylyq Úshkempirov atyndaǵy jekpe-jek saraıynda ótetin bul dodaǵa 48 elden 400-den astam sportshy qatysady dep josparlanǵan.