Eset batyrdyń 350 jyldyǵyna oraı eskertkish ashyldy

Aqtóbe búgin qazaq jerin jońǵarlardan qorǵaǵan, Ábilqaıyr hannyń senimdi serigi bolǵan Eset batyrdyń 350 jyldyǵyna oraı birneshe shara ótkizdi. Batyr kesenesine baryp, rýhyna taǵzym etti. Kesene mańynda memorıaldyq keshen bar. Onda shaǵyn murajaı ashylǵan.
 

Aqtóbe oblystyq tarıhı ólketaný mýzeıiniń bólim meńgerýshisi Aıbek Ertemirov aıtýynsha, memorıaldyq keshen 2013 jyly salynyp, bir bólmesi murajaıǵa berilgen. Mýzeıde batyrdyń úzeńgiles serikterine arnalǵan derekter bar. Sonymen qatar, Eset batyrdyń qyzy Botagóz batyrdyń ómiri týraly aqparat beretin arnaıy taqta ilýli tur.

«XVIII ǵasyrdan jetken batyrdyń kireýke saýyt bar. Eset batyrdyń saýyty 8 keli bolady. Saýyttyń túpnusqasy Aqtóbe oblystyq tarıhı-ólketaný mýzeıinde tur. Al kóshirmesi batyr jerlengen jerde tur. 2013 jyly jergilikti músinshi Kenbaı Jádiger batyrdyń músinin somdady. Sonymen qatar, HH ǵasyrdyń ortasynda el aýzyndaǵy derekter boıynsha batyrdyń qaıtys bolǵan ýaqyty jazylyp, halyq belgi qoıǵan. Osynyń bári mýzeıde tur»,- dedi Aıbek Ertemirov.

Batyrǵa arnalǵan mereıtoı kezinde Bestamaq aýylyna Eset batyrdyń eskertkishi ashyldy. Jergilikti kásipkerler qarjy bólip, bıiktigi 5,5 metr bolatyn eskertkish ornatyldy. Músinshi - Erlan Pirimbetov.

«Ulan baıtaq elimizdi saqtaý úshin babalarymyz qan tókti, ózderiniń erlikterin kórsetti. Tarıhsyz bolashaq bolmaıdy. Tarıhtyń bir bóligi - Eset batyr babamyz. Babamyz qazaqtyń jerin saqtap qalý úshin erlik kórsetip, Ábilqaıyr han bastaǵan qolmen qazaqtyń elin, jerin saqtap qaldy. Biz árýaqytta babalarymyzdyń aldynda basymyzdy ıemiz. Eskertkishtiń ashylýy urpaqtyń Eset batyr aldyndaǵy bir boryshynyń oryndalǵanyn bildiredi»,- dedi Aqtóbe oblysynyń ákimi Berdibek Saparbaev.
 

Eset Kókiulynyń 350 jyldyǵyna arnalǵan sharaǵa batyrdyń urpaǵy, kompozıtor, jazýshy Ilıa Jaqanov qatysty.

«Búkil qazaq dalasy osyndaı eskertkishtermen baıtaq galereıaǵa aınaldy. Rýhymyz, árýaǵymyz kóterilip jatyr. Búgingi urpaq, keler urpaq osy rýhpen óssin. Osy ómirdi kórgen biz baqyttymyz»,- dedi ol. Batyrdyń mereıtoıy kezinde kıiz úı tigilip, etnoaýylda «Dala sazy» kontserti ótti. «El tiregi - er Eset» atty respýblıkalyq aqyndar aıtysy uıymdastyrylyp, aıtysqa 16 aqyn qatysty. Bas júldeni Aspanbek Shuǵataev aldy. Aqynǵa 1 mıllıon teńge berildi.
 

Aıta keteıik, Eset batyr Kókiuly únemi Ábilqaıyr hannyń janynan tabylyp, hannyń bastamalary men Reseıge qosylý oıyn qoldady. Hannyń qasynda bolyp, aqyl-keńesin berdi, han men halyq arasynda dáneker boldy. Bógenbaı batyr, Jánibek batyrmen birigip, Ábilqaıyr handy qoldady, kómek kórsetti. 1743 jyly 3 shildede Reseı patsha úkimetiniń jarlyǵymen Eset Kókiulyna tarhan ataǵy beriledi.