Eseptik tirkeýsiz azamattarǵa qaryz bergen sýbektiler májbúrlep taratylady - agenttik

NUR-SULTAN. QazAqparat - Eseptik tirkeýsiz azamattarǵa qaryz bergen sýbektiler májbúrlep taratylady. Bul jaıynda QR Qarjy naryǵyn retteý jáne damytý agenttiginiń tóraıymy Mádına Ábilqasymovanyń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Kredıtteý naryǵynda biryńǵaı retteýshilik aıany jáne tutynýshylardyń quqyqtaryn qorǵaýdyń biryńǵaı júıesin qalyptastyrý úshin 2020 jylǵy 1 qańtardan bastap agenttiktiń retteý aıasyna halyqqa qaryz beretin barlyq zańdy tulǵalar – onlaın kredıtteý kompanııalary, lombardtar jáne kredıttik seriktestikter engizilgenin atap ótemiz. Jumys istep turǵan sýbektilerdi eseptik tirkeýdiń shekti merzimi 2020 jylǵy 1 qyrkúıekte aıaqtaldy. 1 079 uıym (barlyq banktik emes uıymdardyń 33 paıyzy), onyń ishinde 650 lombard, 202 kredıttik seriktestik jáne 227 mıkroqarjy uıymy agenttikte eseptik tirkeýden ótti», - dedi ol.

Onyń atap ótýinshe, eseptik tirkeýden ótken sátten bastap barlyq kórsetilgen sýbektiler prýdentsııalyq normatıvterdi, mıkrokredıt berý týraly sharttarǵa qoıylatyn talaptardy, syıaqynyń shekti mólsherlemeleriniń shekteýlerin saqtaýǵa, qaryz alýshylardyń borysh júktemesiniń koeffıtsıentterin esepteýge jáne saqtaýǵa, sondaı-aq tutynýshylardyń quqyqtaryn qorǵaý jónindegi ózge de talaptardy saqtaýǵa mindetti.

«Tirkeýden ótpegen 2 187 sýbektiden 1 196 sýbekt áreket etpeıdi, 744-i qyzmetin jalǵastyrýǵa nıeti emestigin, 247-si jarǵylyq kapıtaldyń eń tómen mólsheri joq ekendigin habarlady. Azamattarǵa qaryz berý qyzmetin agenttikte eseptik tirkeýsiz jalǵastyrǵan jaǵdaıda, bul sýbektiler májbúrlep taratylatyn bolady», - dedi Mádına Ábilqasymova.