Esepte turǵan balalardyń sany 40,9%-ǵa azaıdy — Juldyz Súleımenova
ASTANA. KAZINFORM — Jibek Joly telearnasyndaǵy «Búgin.LIVE» baǵdarlamasynda Oqý-aǵartý mınıstri Juldyz Súleımenova býllıngke qarsy qandaı sharalar atqarylyp jatqany jóninde málimdedi.
— Sońǵy úsh jylda balanyń qaýipsizdigin qamtamasyz etýge qatysty 10 zań qabyldandy. Onyń ishinde 2023 jyldan bastap býllıng úshin ákimshilik jaýapkershilik aıqyndaldy. Birneshe jyl buryn býllıng tárbıe máselesi bolatyn, ony dáleldeý de qıyn edi. Jalpy, býllıngke nemquraıly qaraý kúndelikti sıpat alyp ketkeni ókinishti. Al sońǵy úsh jylda bul túıtkilge jete mán berilip keledi. Býllıngke tap bolǵan jáne býllıng jasaǵan balalardy psıhologııalyq súıemeldeý júıeli negizde júzege asyrylady, — dedi ol.
Mınıstrdiń sózinshe, balalar arasyndaǵy quqyq buzýshylyq 4%-ǵa tómendedi. Al esepte turǵan balalardyń sany 40,9%-ǵa azaıdy.
— Bul qabyldanyp jatqan sharalardyń tıimdiligin kórsetedi. Premer-mınıstrdiń orynbasary — Mádenıet jáne aqparat mınıstri Aıda Balaevanyń tóraǵalyǵymen arnaıy Bala quqyqtary jónindegi respýblıkalyq komıssııa, shtab bar. Sol shtabta barlyq ákimniń orynbasarlary, t. b. jaýapty mamandar bar, bárimiz úsh aıda bir jınalamyz. Qaı oblysta, qaı mektepte, qaı synypta kim qandaı býllıng jasaǵanyn qarastyramyz. Bul qazir mekteptiń máselesi bolyp qana qoımaı, Úkimettiń deńgeıinde qaralady, — dedi ol.
Aıta keteıik, buǵan deıin býllıngke tosqaýyl qoıý maqsatynda jańa oqý jylynda qandaı qosymsha tetikter engiziletinin jazǵanbyz.
