Esepke júırik 11 jastaǵy qazaq balasy reseılikterdi tańǵaldyrdy
ASTANA. QazAqparat - 11 jastaǵy almatylyq Álı Baıjigit talantty balalar týraly «Birinshi arnanyń» jańa telebaǵdarlamasyna qatysty. Baǵdarlama júrgizýshisi Maksım Galkın jas almatylyqty uly oıshylǵa teńep, onyń esepti sheshý jyldamdyǵyn sýperkompıýter jyldamdyǵymen birdeı dep baǵa berdi.
Matematıktiń bul qabiletin óte paıdaly, ásirese dúkenge barǵanda kóp kómegin tıgizedi dep qaljyńdady. Synaq retinde Álıge ekrandaǵy azyq-túlikterdiń kalorııasyn qosý tapsyrmasy berildi.
Júrgizýshi kalkýlıator kómegimen onyń qabiletin teksergisi kelip edi, biraq esepti oısha óte jyldam shyǵarǵan bala kalkýlıator ustaǵan júrgizýshini basyp ozdy.
Álı bolashaqta Massachýset tehnologııalyq ýnıversıtetine túsýdi armandaıdy.
Eske sala ketsek, bul baǵdarlamada eń jyldam boksshy qyz Evnıka Sadvakasova jańa rekordyn ornatty. Pavlodar týmasy 30 sekýndta 221 soqqy jasady, onyń jyldamdyǵyna Nıkolaı Valýevtyń ózi tánti boldy.
