Esep úshin halyqpen kezdesý, aldyn ala suraq daıyndaý tyıylsa eken - bloger
NUR-SULTAN. QazAqparat - Bloger Arshat Oraz búgin Prezıdent qol qoıǵan ákimderdiń halyqpen kezdesýi týraly jarlyqqa pikir bildirdi, dep habarlaıdy QazAqparat.
«Prezıdent ákimderge halyqpen baılanys ornatyp, Qazaqstannyń jańǵyrý baǵdarlamasyn túsindirýdi tapsyrdy. Bul endi qalaı oryndalady eken? Eski Qazaqstandaǵydaı otchettarmen jabylar ma eken, álde shynymen jańa ádister qoldanyla ma? Menińshe jańa kadrlar kelmeıinshe burynǵydaı aldyn ala suraqtar daıyndaý, kedeılerdiń úıinde fotoǵa túsý, qalaǵa jaqyn aýdandarǵa ǵana barý jalǵasa beredi. Qateleskim keledi. Esep úshin jumystar tyıylsa eken deısiń. Biraq osynyń ózinen otchettardyń ıisi shyǵyp tur» dep kúmán bildirdi bloger óziniń Telegram paraqshasynda.
Eske sala keteıik, búgin Memleket basshysy Qasym-Jomart Toqaevtyń ákimderdiń halyqpen kezdesýlerin ótkizý týraly Jarlyǵynyń tolyq mátini jarııalanǵan bolatyn.
Onda Prezıdent jarty jylda bir ret oblys ákimderine ár aýdanda jáne oblystyq mańyzy bar ár qalada keminde bir kóshpeli kezdesý ótkizýdi tapsyrdy.
Barlyq deńgeıdegi ákimder jyl saıyn 15 qańtarǵa deıin halyqpen kezdesýdiń jyldyq kúntizbesin jasaıtyn boldy.
