Esep komıtetiniń tóraǵasy Iohannesbýrg qalasynda sheteldik joǵary qarjy baqylaý organdarynyń basshylarymen birqatar eki jaqty kezdesýler ótkizdi

dep habarlaıdy vedomstvonyń baspasóz qyzmeti.

Iohannesbýrg qalasynda ótken Joǵary qarjy baqylaý organdary halyqaralyq uıymynyń (INTOSAI) HH kongresi aıasynda QR Esep komıtetiniń tóraǵasy Omarhan Óksikbaev sheteldik áriptesterimen kezdesti. Omarhan Óksikbaev Frantsýz Respýblıkasy Esep sotynyń bas prezıdenti Dıde Mıgomen, Belgııa Koroldigi Aýdıt sotynyń bas prezıdenti Fılıppe Rolandpen, Reseı Federatsııasy Esep palatasynyń Tóraǵasy Sergeı Stepashınmen, Grýzııa Baqylaý palatasynyń basshysy Levın Bejashvılımen, Moldova Respýblıkasy Esep palatasynyń Tóraǵasy Alla Popeskýmen, Polsha Respýblıkasy Joǵarǵy baqylaý palatasynyń prezıdenti Jasek Jızerskımen, Estonııa Respýblıkasynyń memlekettik baqylaýshysy Mıhkel Ovırmen yntymaqtastyqty nyǵaıtý máselelerin talqylady.

Sonymen qatar, Omarhan ÓksikbaevEkonomıkalyq yntymaqtastyq elderiniń joǵary qarjy baqylaý organdary uıymynyń (EKOSAI) Basqarma prezıdenti - Iran Islam Respýblıkasy Joǵarǵy esep sotynyń prezıdenti Abdol Reza Rahmanı Fazlımen kezdesý ótkizdi. Esep komıteti Tóraǵasynyń pikiri boıynsha, EKOSAI óziniń tıimdiligin ispen dáleldedi, endi INTOSAI quramyna EKOSAI óńirlik birlestik retinde kirý máselesi kún tártibinde tur.

Túrik Esep sotynyń prezıdenti Redjaı Akıelmen bolǵan kezdesýde Esep komıtetiniń tóraǵasy EKOSAI-dyń damý perspektıvalaryn jáne eki jaqty yntymaqtastyqtyń máselelerin qarastyrdy.

Omarhan Óksikbaev Dúnıejúzilik bankiniń ókili Ahmadýlla Mýstafamen kezdesýde qazaqstandyq memlekettik qarjy baqylaý júıesin jetildirý jónindegi jobany iske asyrýǵa beriletin Dúnıejúzilik bankiniń grantine baılanysty qyzyǵýshylyq tanytty.

INTOSAI - joǵary qarjy baqylaý organdarynyń halyqaralyq uıymy. Onyń quramyna álemniń 180-nen astam joǵary qarjy baqylaý organy kiredi. INTOSAI-dyń kongresi úsh jylda bir ret ótkiziledi. Esep komıteti INTOSAI uıymyna 2000 jyldyń mamyr aıynda qabyldanǵan.

EKOSAI - Ekonomıkalyq yntymaqtastyq elderiniń joǵary qarjy baqylaý organdarynyń uıymy. EKOSAI-dyń músheleri - Aýǵanstan, Ázirbaıjan, Iran, Qazaqstan, Qyrǵyzstan, Pákistan, Tájikstan, Túrikmenstan, Túrkııa jáne Ózbekstan. 2007-20010 jyldary EKOSAI Basqarmasy prezıdentiniń qyzmetin QR Esep komıtetiniń Tóraǵasy Omarhan Óksikbaev atqardy.

Esep komıteti QR Prezıdentine tikeleı baǵynatyn jáne esep beretin memlekettik qarjylyq baqylaýdyń joǵary organy bolyp tabylady. Syrtqy baqylaýdy júzege asyrady jáne respýblıkalyq bıýdjettiń atqarylýyn, ortalyq memlekettik organdardyń strategııalyq josparynyń, memlekettik baǵdarlamalardyń iske asyrylýyn baǵalaıdy. Kvazımemlekettik sektor sýbektilerine bólingen memlekettik qarjy resýrstarynyń paıdalanylýyn baqylaıdy. Memlekettiń granttary men aktıvteriniń, memleket kepildik bergen qaryzdardyń paıdalanylý tıimdiligin taldaıdy, sondaı-aq Ulttyq bank aktıvteriniń paıdalaný sáıkestigin baqylaýdy júzege asyrady.