Esep komıtetiniń basshysy Ulttyq qor qarajatyn tıimsiz paıdalaný derekterin synady

NUR-SULTAN. QazAqparat – Respýblıkalyq bıýdjettiń atqarylýyn baqylaý jónindegi esep komıtetiniń tóraǵasy Natalıa Godýnova Ulttyq qordan bólinetin qarajattyń tıimsiz paıdalaný derekterin synǵa aldy, dep habarlaıdy QazAqparat tilshisi.

«Bıýdjettiń shekteýli múmkindikterine qaramastan, 2021 jyly elimizde 1,1 myń jańa joba bastalǵan. Jobalardyń 90 paıyzy Ulttyq qor qarajaty esebinen júzege asyryldy», - dedi N.Godýnova Senattyń jalpy otyrysynda 2021 jylǵy bıýdjettiń oryndalýy týraly esepti qaraý kezinde.

Onyń aıtýynsha, byltyr jospar boıynsha 64 joba aıaqtalmaı qalǵan.

«Ulttyq qor qarjatyn jumsaý bekitilgen tujyrymdamaǵa saı kelmeıdi. Ekinshiden, bul baǵyttaǵy qadamdar álemdik ekonomıkanyń damýy boljamyna qarama-qaıshy», - dedi Esep komıtetiniń basshysy.

Osy oraıda ol Dúnıejúzilik banktiń aqparaty boıynsha álemdik ekonomıkanyń ósý qarqyny asa joǵary bolmaıtynyn, sondaı-aq basqa da syrtqy faktorlar elimizdiń ekonomıkasyna áser etýi múmkin ekenin aıtty. Sondyqtan Qazaqstan Úkimeti bul táýekelderge daıyn bolýy kerek.

«Bıyl bizdi munaı baǵasynyń joǵary bolýy qutqaryp tur. Alaıda Ulttyq qordan bólingen qarajattyń birazyn qazirgi qalypty is-sharalarǵa baǵyttaımyz», - dedi N.Godýnova.

Budan buryn habarlanǵandaı, E. Jamaýbaev jalpy sıpattaǵy transfertterdi kóbirek alý úshin jergilikti jerlerde salyq bazasyn kemitip kórsetý faktilerine qatysty Esep komıtetiniń eskertýi oryndy ekenin aıtty.

Qarjy mınıstri Esep komıtetiniń eskertýine jaýap berdi .

Sonymen qatar ol memleket boryshy qaýipsiz deńgeıde saqtalyp turǵanyn atap ótti.