Esep komıtetiniń aýdıtory paramen ustaldy

ASTANA. QazAqparat - Respýblıkalyq bıýdjettiń atqarylýyn baqylaý jónindegi Esep komıtetiniń memlekettik aýdıtory para alǵany úshin jaýapqa tartyldy, dep xabarlaıdy QazAqparat tilshisi QR Memlekettik qyzmet isteri jáne sybaılas jemqorlyqqa qarsy is-qımyl agenttigine silteme jasap.

Qoǵammen baılanys departamentiniń dırektory Arman Berdalınniń aıtýynsha, komıtet aýdıtory qarjy-sharýashylyq qyzmetin tekserý nátıjesi men onyń qorytyndysyn shyǵarǵany úshin kvazımemlekettik sektor ókilinen 240 myń teńge somasyna taýar men basqa da qundy zattardy alǵan. "Kúdikti óz kinásin tolyq moıyndady. Osyǵan baılanysty ony qamaýǵa alǵan joq. Sotqa deıingi tergeý jalǵasýda", - dedi A.Berdalın Astanada ótken baspasóz máslıxatynda.

Aıta keteıik, búgin agenttik Mańǵystaý oblysynyń dene shynyqtyrý jáne sport basqarmasy basshysynyń qamaýǵa alynǵanyn jarııalady. Ol memleket múddesine 1 mıllıard teńgeden astam somaǵa zalal keltirgen.

Budan bólek, aǵaıyndy Rysqalıevterdiń sybaılasy qamaýǵa alyndy.

Qyzylordada oblystyq basqarma basshysynyń orynbasary ekstremızmge qarsy sharalarǵa bólingen bıýdjet qarjysyn jymqyrǵan.

Al Stepnogorsk qalasynda qoǵamdyq densaýlyqty saqtaý basqarmasynyń basshysy paramen ustaldy.

Sondaı-aq, polıtseılerden aqsha jınaǵan basshylar ustaldy.