Esep komıtetin qarjylandyrý Úkimetten tys bolýy tıis - Azat Perýashev
ASTANA. QazAqparat - Respýblıkalyq bıýdjettiń atqarylýyn baqylaý jónindegi esep komıtetin qarjylandyrý Úkimetten tys bolýy qajet. Mundaı pikirdi búgin Esep komıteti janyndaǵy konsýltatıvtik-sarapshylyq keńes aıasynda BAQ ókilderine suhbat bergen Májilis depýtaty Azat Perýashev aıtty, dep habarlaıdy QazAqparat tilshisi.
«Konsýltatıvtik-sarapshylyq keńestiń basty maqsattarynyń biri - Esep komıtetiniń jumysyn jaqsartý, damytý. Qarap otyrsaq, Esep komıtetiniń jumysyn qarjylandyrý Úkimettiń qolynda eken. Al, táýeldi organ qalaı teksere alady? Bul jerde qarama-qaıshylyqty baıqap otyrmyz. Esep komıteti ózin qarjylandyratyn organdy teksergen kezde ustanymy obektıvti bola almaıdy. Halyqaralyq sarapshylardyń usynysy - Esep komıtetin qarjylandyrý Úkimetten tys bolýy kerek», - dedi Májilis depýtaty.
Sonymen qatar, Azat Perýashev Esep komıteti kórsetken kemshilikterdi memlekettik organdardyń, ulttyq kompanııalar men kvazımemlekettik sektor sýbektileriniń túzeýine qatysty keleńsiz jaıttardyń oryn alatynyn atap ótti.
«Qazirgi ýaqytta Esep komıteti kemshilikterdi túzetý týraly usynys berse, ýaqyt óte kele Úkimet ony sheshildi, oryndaldy dep uıǵarym jasaı salady. Bul durys emes. Esep komıteti tabylǵan zańbuzýshylyq, qarjynyń tıimsiz maqsatqa jumsalýy syndy kemshilikterdiń joıylǵany týraly uıǵarymdy ózi shyǵarýy tıis», - deıdi ol.
Aıta keteıik, keńes otyrysyna qatysýshylar aýdıtorlyq is-sharalardy júrgizý protsesine sarapshylar men aýdıtorlyq uıymdardyń qatysýyn, sonymen qatar aýdıtorlyq iriktemeni aıqyndaý kezinde kásibı paıymdy qoldaný máselelerin jan-jaqty talqyǵa saldy.
