Esep komıteti: Sý sharýashylyǵy komıteti 28 ınvestıtsııalyq jobanyń júzege asyrý merzimin 48 aıǵa deıin keshiktirdi
Esep komıteti baspasóz qyzmetiniń aqparatyna qaraǵanda, QR Aýyl sharýashylyǵy mınıstrliginiń Sý resýrstary komıteti sý sharýashylyǵy nysandaryn salý jáne jańǵyrtýǵa bólingen bıýdjet qarjysyn paıdalaný barysynda birqatar baıypty buzýshylyqtar men kemshilikterge jol jibergen.
Komıtettiń tapsyrys berýshi qyzmeti vedomstvoǵa qarasty uıymǵa («Qazsýsharýashylyǵy» RMK) berilýine baılanysty komıtet sý sharýashylyǵy nysandaryn salý jáne kúrdeli jóndeý jumystarynyń oryndalýy men jumystardy qabyldaýdy baqylaýdy júrgizbegen.
Bıýdjetten bólinetin qarjy kóleminiń jetkilikti bolýyna qaramastan 28 ınvestıtsııalyq jobanyń júzege asyrý merzimi kesheýildep, 6-dan 48 aıǵa deıin sozylyp ketken. Bul jaıt merdigerdiń kelisimshart mindettemesin der ýaqytynda oryndamaýynan týyndaǵan. Birqatar bıýdjettik ınvestıtsııalyq jobalardy júzege asyrý qurylys-montajdaý jumystaryn júrgizýge ókiletti organdarynyń ruqsatynsyz júrgizilgen. Qurylys jumystarynyń avtorlyq jáne tehnıkalyq qadaǵalaýsyz, tólemderdi oryndalmaǵan jáne sapasyn oryndalǵan jumystarǵa aýdarý faktilerdi de anyqtaldy.
2014 jyldyń jeltoqsan aıynda Almaty oblysyna qarasty Panfılov aýdanynda magıstraldy arnaǵa qosylǵan Qorǵas ózenindegi «Dostyq» birikken sý toraby» nysan paıdalanýǵa berilgen. Quny 1173,5 mln. teńgeni quraıtyn sý elektr stansasy sapasyz jobalanýy saldarynan jumys istemeı tur.
«Komıtet 2014-2015 jyldary «Qazsýsharýashylyǵy» RMK-men memlekettik satyp alýlar týraly zańnama normalaryn qoldanbastan 7,6 mlrd. teńge somasyna sý sharýashylyǵy júıesi nysandarynyń qurylysy men kúrdeli jóndeý jumystaryna kelisimshart jasasqan. «Qazsýsharýashylyǵy» RMK sýbmerdiger uıymdy, qural-jabdyqtar men materıaldardy jetkizýshini irikteýdi de konkýrstan tys júrgizgen», - delingen habarlamada.