Esep komıteti Sý resýrstary komıtetin naqty jaǵdaıdy burmalap kórsetti dep aıyptaýda
Eske salsaq, buǵan deıin Esep komıteti sý sharýashylyǵyn damytýǵa bólingen respýblıkalyq bıýdjet qarajatynyń paıdalanylý tıimdiligin baqylaý qorytyndysyn shyǵarǵan bolatyn. Onda Sý resýrstary komıtetiniń fýnktsııalary vedomstvolyq baǵynysty uıymyna («Qazsýshar» RMK) berilgeni, sý sharýashylyǵy obektilerin salý men kúrdeli jóndeý boıynsha jumystardyń oryndalýyna baqylaý júzege asyrylmaǵany aıtylǵan edi. Budan bólek, Esep komıteti anyqtaǵan bıýdjet jáne ózge de zańnama buzýshylyqtarynyń jalpy somasy 73,1 mlrd.teńgeni qurasa, 3,1 mlrd. teńge qarajat tıimsiz paıdalanylǵany belgili bolǵan. Sonymen qatar, Komıtette býhgalterlik eseptiń is júzinde júrgizilmeıtini, býhgalterdiń fýnktsııasy tıisti biliktiligi joq qyzmetkerge júktelgeni kórsetilgen bolatyn.
Alaıda, Sý resýrstary komıtetiniń tóraǵasy Islam Ábishev alqa májilisi barysynda bundaı buzýshylyqtardyń birazyn teriske shyǵardy. Onyń aıtýynsha, buzýshylyqtar anyqtalǵan soma 73 mlrd. teńge bolǵanymen, onyń basym bóligi formaldy erejelerge baılanysty týyndaǵan.
Degenmen, Sý resýrstary komıtetiniń tóraǵasy jasaǵan osy málimdemeden oń, Esep komıteti I. Ábishevtiń sózderi bir-birine qaıshy keletinin alǵa tartty.
«Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishevtiń 14 jeltoqsanda ótken jıynda jasaǵan málimdemesi men túsindirmesi onyń 10 jeltoqsanda Esep komıtetiniń otyrysynda bergen túsindirmelerine qaıshy keledi. Máselen, Islam Ábishev pen Aýyl sharýashylyǵy vıtse-mınıstri E. Nysanbaevtyń buqaralyq aqparat quraldary ókilderiniń qatysýymen anyqtalǵan buzýshylyqtardyń sebepterine túsinik berý kezinde buzýshylyqtardyń barlyq faktisin moıyndap, olardy joıý jáne aldaǵy ýaqytta jol bermeý jóninde rastap aıtqan bolatyn. Osyǵan oraı, Esep komıteti anyqtaǵan barlyq buzýshylyq faktileri qujattarmen rastalǵan, osyǵan baılanysty, kórsetilgen málimdemeler men túsindirmeler durys emes, orynsyz jáne shyn mánindegi jaǵdaıdy burmalap kórsetken dep esepteıdi. Sonymen qatar, anyqtalǵan buzýshylyqtardyń 9 faktisi boıynsha baqylaý materıaldary quqyq buzýshylyq týraly isterdi qaraýǵa jáne qylmystyq qýdalaýdy júzege asyratyn ýákiletti organdarǵa jiberiletinin atap ótemiz», - delingen málimdemede.