Esep komıteti ShQO-da 401,1 mln teńgeniń qarjylyq buzýshylyǵyn anyqtady
NUR-SULTAN. QazAqparat – Esep komıteti Shyǵys Qazaqstan oblysynda 401,1 mln teńgeniń qarjylyq buzýshylyǵyn anyqtady. Bul týraly Esep komıtetiniń otyrysynda aýdıtorlyq toptyń jetekshisi Talǵat Jaqan málim etti, dep habarlaıdy QazAqparat tilshisi.
«Bıylǵy jyldyń úshinshi toqsanynda Shyǵys Qazaqstan oblysyna bólingen memlekettik bıýdjet qarjysyn ıgerýge qatysty memlekettik aýdıt júrgizildi. Aýdıt 19 nysanǵa qatysty júrgizilip, qamtylǵan qarjynyń jalpy somasy 72 mlrd 709 mıllıon teńgeni qurady», - dedi Esep komıtetiniń múshesi Talǵat Jaqan.
Onyń sózine qaraǵanda, respýblıkalyq bıýdjet qarajatyn paıdalaný kezinde josparlanǵan sharalardy iske asyrýdyń sapasy men tıimdiligine teris áserin tıgizetin birqatar kemshilikter men buzýshylyqtarǵa jol berilgeni anyqtaldy.
Atap aıtqanda, memleket tarapynan «Bıznestiń jol kartasy – 2020» baǵdarlamasy aıasynda qajetti ınjenerlik ınfraqurylymmen qamtamasyz etilgenine qaramastan, ınvestordyń tarapynan aýysymyna qýaty 1 400 bas usaq malǵa arnalǵan qasaphana tsehyn, 50 000 bas qoıǵa arnalǵan bordaqylaý alańyn salý jáne jańa jumys oryndaryn ashý boıynsha mindettemeleri oryndalmaǵan.
Semeı qalasy áýejaıynyń ushyp-qoný jolaǵyn, rýldeý jolyn jáne aerovokzalyn somasy 10,7 mlrd teńgege rekonstrýktsııalaý jer telimine quqyq belgileıtin qujattarsyz júzege asyrylǵan. Bul óz kezeginde nysandy paıdalanýshy uıymǵa berý merziminiń keıinge sozylýyna alyp keldi.
Taratylǵan málimetke qaraǵanda, Aýyl sharýashylyǵy basqarmasy tarapynan ınvestorlardyń qyzmetine, jabdyqtardy, tehnıkany maqsatyna saı jáne tıimdi paıdalanýǵa, sondaı-aq jobanyń tolyq iske asyrylýyna monıtorıng júrgizý tıisti deńgeıde atqarylmaǵandyǵy belgili boldy. AÓK sýbektilerin qoldanystaǵy sýbsıdııalaý tártibine sáıkes kelmeıtin 300 mln teńgeden astam somaǵa sýbsıdııalaý faktileri anyqtaldy.
Memlekettik aýdıt qorytyndysy boıynsha Esep komıteti jalpy somasy 401,1 mln teńgeniń qarjylyq buzýshylyǵyn, somasy 1 mlrd 652,5 mln teńge kólemindegi bıýdjet qarajatynyń tıimsiz paıdalanylǵanyn, 17,9 mlrd teńgege memlekettik satyp alý salasyndaǵy zańnama normalarynyń saqtalmaǵanyn jáne 158 rásimdik buzýshylyqty anyqtady.
Otyrys qorytyndysy boıynsha Esep komıteti ShQO ákimdigine, Qarjy jáne Aýyl sharýashylyǵy mınıstrlikterine anyqtalǵan buzýshylyqtar men kemshilikterdi, olarǵa yqpal etetin sebepterdi joıý, sondaı-aq zańnamany buzýǵa jol bergen laýazymdy adamdardyń jaýapkershiligin qaraý jóninde tapsyrma berdi.
