Esep komıteti kvazımemlekettik sektordaǵy júıeli problemalardy atady
NUR-SULTAN. QazAqparat – Senatta Úkimettiń jáne Esep komıtetiniń 2020 jylǵy respýblıkalyq bıýdjettiń atqarylýy týraly esepterin qaraý kezinde kvazımemlekettik sektordaǵy kemshilikter aıtyldy, dep habarlaıdy QazAqparat tilshisi.
«Memleket basshysynyń tapsyrmasy boıynsha kvazımemlekettik sektordyń iri kompanııalarynyń kóbine aýdıt júrgizildi. Tek 2020 jyly kvazımemlekettik sektordyń 25 sýbektisi jáne olardyń aktıvteriniń 16 trln teńgesi aýdıtpen qamtyldy. 60 júıelik problema men kemshilikter, 41 mlrd teńge qarjylyq buzýshylyq, 340 mlrd teńgege aktıvterdi tıimsiz basqarý anyqtaldy», - dedi Respýblıkalyq bıýdjettiń atqarylýyn baqylaý jónindegi esep komıtetiniń tóraǵasy Natalıa Godýnova.
Onyń aıtýynsha, ázirge, kvazımemlekettik sektordy joǵary tehnologııalyq ári tıimdi ınstıtýttarǵa transformatsııalaý tıisti nátıje bermeı otyr.
«Transformatsııa uzaqqa sozylyp barady, keshendi jospardy júzege asyrý qorytyndysy boıynsha jekeshelendirý tek 62 paıyzǵa qamtamasyz etildi»,- dedi Esep komıtetiniń basshysy.
Onyń paıymynsha, memlekettik aktıvterdi basqarý boıynsha qadamdarǵa ózgerister engizý qajettigi týyndap otyr. Osy oraıda kvazımemlekettik sektor sýbektileri qyzmetin strategııalyq josparlaýdy jetildirý kerek. Sonymen qatar borysh júktemesin qadaǵalaýdy kúsheıtip, korporatıvti jáne dıvıdent saıasatyn naqty reglamentteý mańyzdy.
