Esep komıteti Kólik jáne kommýnıkatsııa vıtse-mınıstri D. Kóterbekovti jáne Avtomobıl joldary komıtetiniń tóraǵasy Z. Saǵynovty kyzmetinen bosatý jóninde Úkimetke usynys berdi
ASTANA. Qyrkúıektiń 28-i. QazAqparat /Qanat Mámetqazyuly/ - Elimizdegi Avtojol salasyn damytýdyń 2006-2012 jyldarǵa arnalǵan baǵdarlamasy tıimsiz júzege asyrylǵan.
Osyǵan oraı, Respýblıkalyq bıýdjettiń atqarylýyn baqylaý jónindegi esep komıteti Kólik jáne kommýnıkatsııa vıtse-mınıstri D. Kóterbekovti jáne Avtomobıl joldary komıtetiniń tóraǵasy Z. Saǵynovty kyzmetinen bosatý jóninde Úkimetke usynys berdi. Bul týraly QazAqparat Komıtettiń baspasóz qyzmetine silteme jasap habarlaıdy.
«2006-2009 jyldary baǵdarlamany júzege asyrýǵa baǵyttalǵan bıýdjet qarjysy jáne zaemdyq qarajatty paıdalaný kezinde 10,5 mlrd. teńge zań talaptaryn buza otyryp jumsalǵan. Baqylaý barysynda jol jumystarynyń sapasyz oryndalǵany, jekelegen jumystardyń jobalaý-smetalyq qujattamaǵa saı júrgizilmegeni anyqtaldy. Sonymen birge tehnıkalyq normalar men erejelerdiń buzylýyna jol berilgen. Kúrdeli jóndeý jumystary júrgiziletin avtojoldar iriktelgen kezde olardyń ekonomıkalyq negizdelgen ólshemderi bolmaǵan. Budan bólek, baǵdarlamany iske asyrý kezinde jóndeý jumystarynyń merzimi men kólemi respýblıkalyq jáne jergilikti avtojoldar boıynsha josparlanǵan kórsetkishterge saı kelmegen. 2006-2009 jyldary respýblıkalyq mańyzy bar avtojoldardy salý jáne qaıta jańartý kezinde 560 shm joldyń jáne kúrdeli jóndeý kezinde 3294 shm joldyń jumystary oryndalmaǵan», delingen baspasóz qyzmeti taratqan aqparatta.
Sonymen birge, Esep komıtetiniń tekserýlerine súıensek, el aýmaǵy boıynsha iri gabarıtti jáne aýyr júk tıelgen avtokólikterdiń ótýine kólik baqylaýy turaqty júrgizilmegen eken. Bul óz kezeginde, salynǵan jáne jóndelgen jol jabyndarynyń merziminen buryn búlinýine ákep soqqan. Máselen, Atyraý jáne Aqtóbe oblystarynda qaıta jańartylǵan ýchaskilerdiń 225 shm avtojolynda júk avtokólikteriniń baqylaýsyz ótýine jol berilgen. Osynyń saldarynan, jol jabyny búlinip, ony jóndeýge jumsalǵan 1 mlrd. teńgeden astam bıýdjet qarajaty tıimsiz paıdalanylǵan. Budan bólek, jergilikti atqarýshy organdarda memlekettiń avtojoldardy salý nemese keńeıtý jónindegi sheshimderi týraly aqparatty teris pıǵylda paıdalaný jaǵdaıy da kezdesken. Osy turǵyda avtojol salasyndaǵy jobalardy iske asyrýǵa kajetti jer telimderin memlekettik kadastrlyq baǵamen satyp otyrǵan faktiler de anyqtalǵan. Al keıinnen osy jer ýchaskelerin menshik ıelerinen naryqtyq baǵamen satyp alýǵa týra kelgen, sóıtip respýblıkalyq bıýdjet esebinen júzege asyrylatyn jobalardyń quny qymbattap ketken.
«Esep komıteti Úkimetke avtokólik salasyndaǵy jańa baǵdarlamalyq qujattardy bekitken kezde salalyq baǵdarlamany iske asyrý nátıjelerin eskerýdi usynady. Sonymen qatar, Úkimetke Avtojol salasyn damytýdyń 2006-2012 jyldarǵa arnalǵan baǵdarlamasyn iske asyrý barysynda bıýdjet qarajatyn paıdalanýdaǵy jol bergen óreskel olqylyqtary men kemshilikteri úshin Kólik jáne kommýnıkatsııa vıtse-mınıstri D. Kóterbekovti jáne Avtomobıl joldary komıtetiniń tóraǵasy Z. Saǵynovty kyzmetinen bosatý jóninde usynys berdi. Budan basqa, Indýstrııa jáne jańa tehnologııalar mınıstrligine Údemeli ındýstrııalyq-ınnovatsııalyq damytý jónindegi 2010-2014 jyldarǵa arnalǵan memlekettik baǵdarlamany iske asyrý barysynda avtomobıl joldaryn salýǵa arnalǵan otandyq jol-qurylys materıaldary óndirisin damytýdyń qajettiligine nazaryn aýdarady. Qarjy mınıstrligine Kólik jáne kommýnıkatsııa mınıstrliginiń avtojol salasyn damytýǵa jyl saıynǵy shyǵyndardy josparlaýy kezindegi esepteriniń oryndylyǵy men anyqtyǵyna bıýdjettik ótinimderiniń sáıkestigin qamtamasyz etý tapsyryldy. Sondaı-aq Qarjy mınıstrligine memlekettik muqtajdyqtar úshin jyljymaly jáne jyljymaıtyn múlikti satyp alý nátıjesinde balansqa alynatyn jabdyqtar men materıaldardy esepke alýdy, saqtaýdy jáne ótkizýdi jetildirý jóninde sharalar qoldaný usynyldy», delingen baspasóz qyzmeti taratqan málimette.
