Esep komıteti «QazAgro» holdıngi aktıvterdi tıimsiz paıdalanǵanyn anyqtady

NUR-SULTAN. QazAqparat - «QazAgro» holdıngi boıynsha júrgizilgen aýdıt qorytyndysy boıynsha 47 mln teńge somasynda qarjylyq buzýshylyq anyqtaldy. Bul týraly Esep komıtetiniń múshesi Halıda Qambarova málim etti, dep habarlaıdy QazAqparat tilshisi.

«Aýdıt qorytyndysy boıynsha holdıng toptarynda 47,1 mln teńgege qarjylyq buzýshylyqtar anyqtaldy. Qarjy men kvazımemlekettik sektor aktıvterin tıimsiz paıdalaný - 392,5 mlrd teńge», - dedi H. Qambarova Respýblıkalyq bıýdjettiń atqarylýyn baqylaý jónindegi esep komıtetiniń otyrysynda.

Onyń sózine qaraǵanda, atalǵan somanyń ishinde ekonomıkalyq shyǵyn 206,5 mlrd teńgeni, taza shyǵyn 107 mlrd teńgeni qurady.

Aıta keteıik, Esep komıtetinde «QazAgro» holdıngi men onyń enshiles uıymdary qyzmetiniń tıimdiligine júrgizilgen memlekettik aýdıt qorytyndysy jarııalandy.

Budan buryn habarlanǵandaı, bıyl mamyr aıynyń sońynda Parlament Senaty Qarjy jáne bıýdjet komıtetiniń keńeıtilgen otyrysynda «QazAgro» holdıngin saýyqtyrý boıynsha qadamdardyń iske asyrylý máselesin kóterdi.

Osy oraıda ekinshi deńgeıli bankter aýyl sharýashylyǵy taýarlaryn óndirýshilerge nesıe bermeıtindigi, al «QazAgro» eki jyl boıy shyǵynmen jumys istep jatqandyǵy aıtyldy.

Belgili bolǵandaı, «QazAgro» holdıngi» AQ-ny damytýdyń strategııalyq baǵdarlamasy ázirlenip jatyr.