Esep komıteti qarjylyq resýrstardyń qoljetimdigine qatysty usynystar engizdi
Aıta keteıik, búgin Senattyń Qarjy jáne bıýdjet komıtetiniń keńeıtilgen otyrysynda 2018 jylǵy respýblıkalyq bıýdjettiń atqarylýy talqylandy.
«2018 jylǵy respýblıkalyq bıýdjettiń atqarylýy týraly Úkimettiń esebine Esep komıtetiniń qorytyndysy Parlament Senatynyń barlyq komıtetterinde talqylaýdan ótip, qoldaý tapty. Qorytyndy aıasynda respýblıkalyq bıýdjettiń atqarylýynyń makroekonomıkalyq jaǵdaılaryna taldaý men baǵalaý jasaldy. Salyqtyq jáne kedendik ákimshilendirýdiń tıimdiligine bıýdjettiń baǵdarlamalar ákimshileri bólinisinde respýblıkalyq bıýdjettiń shyǵys bóliginiń atqarylýyna baǵalaý júrgizildi. Onyń ústine, 2025 jylǵa deıingi Strategııalyq jospardyń nysanaly ındıkatorlarynyń qoljetimdiligi alǵash ret aımaqtardy damytý baǵdarlamalarynyń deńgeıinen bastap qarastyryldy. Jaǵymdy makroekonomıkalyq ahýal 2018 jyly bıýdjettiń negizgi parametrleriniń atqarylýyn qamtamasyz etýge múmkindik berdi. Degenmen eldiń odan ári ilgeri damýynda táýekelder baıqalatyny Sizderge belgili bolyp otyr», - dedi N. Nurjanov.
Onyń sózine qaraǵanda, ekonomıkanyń shıkizattyq táýeldiligi saqtalýda. Bank sektorynyń jaǵdaıy álsizdeý, tipti bankterdiń ornyqtylyǵy ındıkatory boıynsha halyqaralyq reıtıngterde Qazaqstan pozıtsııasynyń nasharlaýy baıqalýda. Osynyń barlyǵy ekonomıkany qajetti qarjy resýrstarymen, ásirese, uzyn aqshamen jetkilikti dárejede qamtamasyz etýge múmkindik bermedi. Shaǵyn kásipkerlik sýbektilerine nesıe berý úlesi qysqaryp otyr.
«Osyǵan qaraı Esep komıteti el ekonomıkasynyń munaı-gaz sektoryna táýeldiligin tómendetý jáne ony odan ári ártaraptandyrý maqsatynda óńdeý sektoryna ınvestıtsııalar tartý boıynsha belsendi saıasat júrgizýdi usynyp otyr. Sonymen qatar, ınflıatsııany tejeýge qatysty sharalardy atqarý kezinde ekonomıkanyń qarqyndy ósýi úshin qarjylyq resýrstardyń qoljetimdigin qamtamasyz etý maqsatyna aldaǵy ýaqytta aqsha-nesıe saıasatyn jeńildetý múmkindikterin qarastyrý mańyzdy», - dedi Nurlan Nurjanov.
Esep komıtetiniń baǵalaýynsha, Úkimet respýblıkalyq bıýdjettiń josparly parametrlerin oryndady. Degenmen bıýdjettiń kiris bóligin ulǵaıtý úshin rezervter bar. Shoǵyrlandyrylǵan bıýdjettiń salyqtyq túsimderi qurylymyn taldaý barysynda bıýdjettiń ekonomıkanyń shıkizat sektoryna táýeldiliginiń kúsheıgenin kórsetip otyr.
Budan buryn habarlanǵandaı, jaqynda Úkimettiń 2018 jylǵy respýblıkalyq bıýdjettiń atqarylýy týraly esebin tanystyrý barysynda Premer-Mınıstrdiń birinshi orynbasary - Qarjy mınıstri Álıhan Smaıylov bıýdjettiń kólemindegi áleýmettik shyǵystardyń úlesi artqanyn aıtty.
