Esep komıteti: Qarjylyq buzýshylyqtarǵa tikeleı jaýaptylardy jazalaý kerek
NUR-SULTAN. QazAqparat - QR Parlamenti Senatynda Esep komıtetiniń tóraıymy Natalıa Godýnova qarjylyq buzýshylyqtarǵa tikeleı qatysty adamdardy jaýapqa tartý máselesin kóterdi, dep habarlaıdy QazAqparat tilshisi.
«Jalpy, sapasyz bıýdjettik sheshimder 2018 jyly 138 mlrd teńge tıimsiz shyǵystarǵa ákep soqtyrdy. Onyń ishinde 26 mlrd teńge qarjylyq buzýshylyqtarǵa tıesili. Bul rette, ádettegideı qarjylyq buzýshylyqtardyń 90 paıyzǵa jýyǵy býhgalterlik eseptilik salasyndaǵy kemshilikter. Aýdıt qorytyndysy boıynsha anyqtalǵan qarjylyq buzýshylyqtar somasynyń 100 paıyzy ótelip, qalpyna keltirilgenimen, jiberilgen buzýshylyqtar úshin derbes jaýaptylyq týraly másele ózekti bolyp qalýda», - dedi N. Godýnova 2018 jylǵy respýblıkalyq bıýdjettiń atqarylýy týraly Úkimettiń esebine Esep komıtetiniń qorytyndysyn tanystyrý kezinde.
Onyń sózine qaraǵanda, kóp jaǵdaıda kináli adamdardyń óz erkimen jumystan ketýlerine baılanysty olar kóbinese jaýapqa tartylmaıdy. Jekelegen jaǵdaılarda tártiptik is júrgizý qozǵalǵannyń ózinde qatardaǵy oryndaýshylarǵa qatysty ǵana qozǵalady.
«Qarjylyq buzýshylyqtar úshin laýazymdy adamdardy mindetti túrde jaýaptylyqa tartýdy engizý bóliginde qoldanystaǵy zańnamaǵa ózgerister engizý óte mańyzdy dep esepteımiz. Osy oraıda buzýshylyq somasyna baılanysty, sondaı-aq bıýdjet qarajaty men memleket aktıvterin tıimsiz josparlaǵany jáne tıimsiz paıdalanǵany úshin osy jaýaptylyqtyń ara-jigin belgileý qajet. Elbasynyń da osyndaı tıisti tapsyrmasy bolǵan, sonymen qatar depýtattar da qoldaý bildirgen», - dedi Esep komıtetiniń tóraıymy
