Esep komıteti: Bıýdjet qarjysyn tıimsiz josparlaǵan 200-den astam qyzmetshi jazalandy
«Jalpy, sapasyz bıýdjettik sheshimder 2018 jyly 138 mlrd teńge tıimsiz shyǵystarǵa ákelip soqtyrdy. Al bul rette kim jaýapqa tartyldy? Kóbine bul sheshimderdi qabyldamaıtyn qatardaǵy oryndaýshylar jazalanady. Esep komıtetiniń materıaldaryna súıensek, 2018 jyly tártiptik jaýapqa 224 qyzmetker tartylyp, onyń tek 9 paıyzy basshylar», - dedi N. Godýnova 2018 jylǵy respýblıkalyq bıýdjettiń atqarylýy týraly Úkimettiń esebine Esep komıtetiniń qorytyndysyn tanystyrý kezinde.
Onyń paıymynsha, qarjylyq zańbuzýshylyqtar úshin laýazymdy adamdardy mindetti túrde jaýapqa tartýdy engizý bóliginde qoldanystaǵy zańnamaǵa ózgerister engizý óte mańyzdy. Osy oraıda zańbuzýshylyq somasyna baılanysty, sondaı-aq bıýdjet qarajaty men memleket aktıvterin tıimsiz josparlaǵany jáne tıimsiz paıdalanǵany úshin osy jaýaptylyqtyń ara-jigin belgileý qajet.
Óz kezeginde Úkimet basshysy Asqar Mamın bıýdjettik josparlaý protsesi Bıýdjet kodeksi normalaryna sáıkes júrgizilip jatqanyn aıta kele: «Osy protseste birshama kemshilikter bar. Qazir olardy joıý maqsatynda Úkimette birqatar tujyrymdamalyq ózgerister daıyndap jatyrmyz», - dedi.