Esep komıteti «Baıqońyr» kesheniniń 109 nysanynda buzýshylyqtar anyqtady

ASTANA. QazAqparat - QR Qorǵanys jáne aeroǵarysh ónerkásibi mınıstrliginiń Aeroǵarysh komıtetine aýdıt júrgizgen Esep komıteti atalǵan vedomstvoda qarjylyq, bıýdjet qarajatyn tıimsiz paıdalaný jáne rásimdik buzýshylyqtar anyqtalǵanyn málimdedi, dep habarlaıdy «QazAqparat» HAA tilshisi Respýblıkalyq bıýdjettiń atqarylýyn baqylaý jónindegi esep komıtetiniń baspasóz qyzmetine silteme jasap.

Vedomstvonyń habarlaýynsha, Reseı tarapynan qabyldap alynǵan «Baıqońyr» kesheniniń 109 nysanyn paıdalaný keleshegi men olardy balansqa alatyn mekeme aıqyndalmaǵan. 2009-2017 jyldar aralyǵynda olardy qorǵaýǵa 742,0 mln.teńge shyǵyn jumsalǵan. Sonymen qatar, aeroǵarysh komıtetinde kvazımemlekettik sektor sýbektileriniń jarǵylyq kapıtalyn ulǵaıtýǵa bólinetin bıýdjet qarajatyn qaıtarý jáne odan ári paıdalaný tetiginiń joq ekendigi anyqtalǵan. Máselen, «KazSat-3» ǵarysh apparatyn jasaý jáne ushyrý jobasyn iske asyrý úshin alynǵan 0,6 mln.teńge mólsherindegi qarajat qaldyǵy 2015 jyldan beri «Respýblıkalyq ǵaryshtyq baılanys ortalyǵy» AQ-nyń shotynda jazylyp kelgen.

«Qazaqstan Ǵarysh Sapary» UK» AQ-nyń jalpy somasy 2 848,7 mln.teńgelik «Ǵarysh apparattaryn qurastyrý-synaý keshenin salý» jobasy sheńberinde jabdyqtardy satyp alý boıynsha shyǵyndardy kiriske alý bóliginde býhgalterlik esepti júrgizý tártibiniń buzýshylyqtary anyqtaldy. Aeroǵarysh komıtetiniń vedomstvolyq baǵynyshty uıymdary jol bergen sapasyz oryndalǵan jumys kólemin qabyldaý, tehnıkalyq qadaǵalaýdyń súıemeldeýinsiz qurylys-montajdaý jumystaryn oryndaý jáne obektiler qurylysynyń normatıvtik merzimin saqtamaý bóliginde sáýlet, qala qurylysy jáne qurylys qyzmeti týraly zańnamanyń buzýshylyqtary anyqtaldy», - delingen habarlamada.

Memlekettik aýdıt qorytyndylary boıynsha Esep komıteti jalpy somasy 3 637,7 mln. teńgeniń qarjylyq buzýshylyqtaryn, bıýdjet qarajatyn tıimsiz paıdalanýǵa qatysty  646,1 mln. teńgeniń buzýshylyqtaryn jáne 24 812,5 mln. teńgege 36 rásimdik zańsyzdyqtar anyqtaǵan.

«Memlekettik aýdıt barysynda 2 640,8 mln. teńge ótelip, qalpyna keltirildi. Memlekettik aýdıttiń jekelegen materıaldary ákimshilik quqyq buzýshylyqtar týraly isterdi qaraýǵa ýákiletti organdarǵa protsestik sheshimder qabyldaý úshin jiberildi. Otyrystyń qorytyndysy boıynsha Úkimetke, Qorǵanys jáne aeroǵarysh ónerkásibi mınıstrligine, Qorǵanys jáne aeroǵarysh ónerkásibi mınıstrliginiń Aeroǵarysh komıtetine jáne onyń vedomstvolyq baǵynyshty uıymdaryna anyqtalǵan buzýshylyqtardy joıýǵa jáne eskertýge, bıýdjet jáne ózge de zańnama talaptarynyń saqtalýyn qamtamasyz etpegen laýazymdy adamdardyń jaýaptylyǵyn qaraýǵa baǵyttalǵan birqatar tapsyrmalar berildi», - dep habarlaıdy Esep komıtetinen.