Esentaı jaǵalaýyndaǵy jańa art-marshrýt almatylyqtardyń qyzý talqysyna tústi
ALMATY. KAZINFORM — Almatynyń Esentaı jaǵalaýy qala týraly án joldarymen bezendirildi.
Almatyda Buhar Jyraý kóshesinen Tımırıazev kóshesine deıingi Esentaı jaǵalaýynda qalalyq art-marshrýt jasaldy. Beton betinde Almatyǵa arnalǵan uzynnan sozylǵan kórkem kompozıtsııa paıda boldy.
Qala ákimdiginiń málimetinshe, ándi QR kodyn paıdalanyp tyńdaýǵa bolady.
— Olar serýen barysynda birtindep paıda bolyp, tutas vızýaldy áńgimege ulasady. QR-kod arqyly mýzykalyq shyǵarmany qosyp, marshrýt boıymen júrip ótip, onyń ártúrli bólikterinen án joldaryn tabýǵa bolady. Adam Esentaıdyń boıymen júrgen saıyn kompozıtsııa birtindep ashyla túsedi, — dep túsindirdi ákimdik.
Beton qabyrǵalardy bezendirý úshin syrtqy jumystarǵa arnalǵan kásibı qasbettik boıaýlar men arnaıy graffıtı boıaýlary qoldanylǵan.
Joba demeýshilerdiń qarajaty esebinen júzege asyrylǵan.
Alaıda bul jańashyldyqqa qatysty qala turǵyndarynyń pikiri ekige bólindi. Keıbir turǵyndar muny Abaı dańǵyly baǵytyna qaraı jalǵastyrýǵa qarsylyq tanytty.
— Aýdan turǵyndary jumystardy toqtatyp, jaǵalaýdy Abaı dańǵylynan ári qaraı boıamaýdy surady. Olardyń aıtýynsha, ashyq tústi órnekter jaǵalaýdyń syrtqy kelbetin buzady. Sondaı-aq turǵyndar muny nege aldyn ala olarmen talqylamaǵanyn surap otyr, — delingen pikirlerdiń birinde.
Jelide art-marshrýtty synap, pikirler arasynda «Balalardyń shımaıyna uqsaıdy, quddy bir 5–7 jasar balalar salǵandaı. Strıt-artpen aınalysatyn jaqsy sýretshiler bar ǵoı», «Óte nashar. Qandaı da bir kontseptsııa bolý kerek qoı» degen oılar boldy. Taǵy bir almatylyq munyń ornyna tústerin úılesimdi etip, basqa sýret salýǵa bolatynyn jazdy.
Alaıda oń baǵasyn bergender de bar.
— Sýretshi ári dızaıner retinde «tym ashyq tústi» degen pikirmen kelise almaımyn. Munda túster jetkilikti dárejede jınaqy qoldanylǵan. Munda tek reńkine emes, onyń qanyqtyǵyna, jaryqtyǵyna, kontrastyna jáne tústik daqtyń kólemine de baılanysty, — dedi qala turǵyny Ǵalııa.
Onyń aıtýynsha, zamanaýı qalalyq ortada tús tek sándik element emes, sonymen qatar belgili bir jerdiń ereksheligin qalyptastyrýǵa, navıgatsııaǵa jáne keńistiktiń jaqsy qabyldanýyna áser etetin qural bola alady.
Eske salsaq, Almatyda kóshege syzylǵan túrli-tústi jol tańbasy neni bildiretinin jazǵanbyz.
