Esentaı ózeninen munaı ónimderiniń artyq mólsheri anyqtaldy
ALMATY. KAZINFORM — Almaty boıynsha ekologııa departamentiniń basshysy Dinmuhamed Lesbekov 2026 jyldyń birinshi jarty jyldyǵyndaǵy qorshaǵan orta jaǵdaıyna júrgizilgen zerthanalyq-taldamalyq baqylaýdyń nátıjelerin tanystyrdy.
Onyń aıtýynsha, esepti kezeńde Almatyda atmosferalyq aýanyń jáne sý nysandarynyń joǵary ári tótenshe joǵary deńgeıde lastaný derekteri tirkelmegen.
Departament mamandary qaladaǵy túrli nysandarda aýa, sý, topyraq jáne óndiristik shyǵaryndylarǵa zerthanalyq zertteýler júrgizdi.
— Zerthanalyq baqylaý qorshaǵan orta jaǵdaıyn obektıvti baǵalaýǵa jáne ekologııalyq talaptardyń buzylýyna der kezinde den qoıýǵa múmkindik beredi, — dedi Dinmuhamed Lesbekov.
Avtokólik shyǵaryndylaryn baqylaýǵa erekshe kóńil bólingen. Osy jyldyń birinshi jartyjyldyǵynda 446 dızeldi avtokólikke aspaptyq baqylaý júrgizilip, onyń 71-nen shyǵaryndylardyń belgilengen normatıvterden asyp ketkeni anyqtaldy. Quqyq buzýshylarǵa qatysty ákimshilik sharalar qabyldanyp, salynǵan aıyppuldardyń jalpy somasy 32,6 mln teńgeden asty.
Sonymen qatar mamandar Esentaı, Úlken Almaty, Kishi Almaty, Aqsaı, Basqarasý ózenderi men Saıran kóliniń ekologııalyq jaı-kúıin tekserdi. Zertteý qorytyndysy boıynsha munaı ónimderiniń mólsheri belgilengen normadan joǵary bolýy tek Esentaı ózeninde anyqtaldy. Al qalǵan baqylaý núktelerinde normatıvten asý derekteri tirkelmegen.
Topyraq synamalaryn taldaý nátıjeleri de lastaýshy zattardyń shekti ruqsat etilgen kontsentratsııasynan asyp ketý faktilerin kórsetken joq.
Eske salaıyq, buǵan deıin Almatyda ekologııalyq talaptardy buzǵan 200 kólik anyqtalǵanyn jazǵanbyz.
