Býyrqanyp aqqan Esentaı almatylyqtardy alańdatyp qoıdy
ALMATY. KAZINFORM — Aqsaı, Qarǵaly, Úlken jáne Kishi Almaty ózenderi sý deńgeıiniń kóterilgeni baıqalady.
Almaty qalalyq tótenshe jaǵdaılar departamentiniń málemetinshe, qazir qalada «Qazseldenqorǵaý» memlekettik mekemesiniń 10 gıdroposty jumys isteıdi.
Olar táýlik boıy ózenderdegi gıdrometeorologııalyq jaǵdaıdy baqylap otyr.
«Qala arqyly Aqsaı, Qarǵaly, Úlken jáne Kishi Almaty ózenderi aǵady. Jaýyn-shashynǵa baılanysty ózenderde sý shyǵynynyń shamaly ǵana kóterilgeni baıqalady, sondaı-aq kólbeý aǵynǵa baılanysty sýdyń laılanýy 2 ballǵa deıin artty» dep habarlady departamentten.
Budan basqa, «Qazseldenqorǵaý» mamandary selden qorǵaý qurylystarynyń tehnıkalyq jaı-kúıine tekserý júrgizedi.
«26 naýryzdan bastap Almaty TJD jeke quramy jumystyń kúsheıtilgen nusqasyna aýystyryldy, jedel shtab jumys isteıdi, qosymsha táýlik boıy „Qazseldenqorǵaý“ qalalyq fılıaly mehanıkalandyrylǵan brıgada qurdy. Sondaı-aq samosvaldar, tıegishter, kran men ekskavator tarta otyryp, olar kommýnaldyq qyzmettermen birlesip ózen arnasy men tundyrý basseınderin tereńdetý jumysyn júrgizdi» dedi Almaty qalasy TJD bastyǵy Nurlan Atyǵaev.
Tańǵy saǵat 4:00–den bastalǵan jaýyn áli jaýyp tur.
Ol arasy úzilip-úzilip 17 sáýirdiń tańyna deıin jaýady degen boljam bar.
