Esentaı ózeninde kólikpen júrgen 17 jastaǵy jasóspirim 5 bap boıynsha jaýapkershilikke tartyldy

ALMATY. KAZINFORM — Almatyda Esentaı ózeniniń arnasyna kólikpen kirgen júrgizýshi jaýapqa tartyldy. 

Qalalyq polıtsııa departamentiniń málimetinshe, Esentaı ózeniniń arnasyna Toyota markaly avtokólikpen kirgen júrgizýshini anyqtaldy. Ol — 17 jastaǵy jasóspirim. Polıtsııa barlyq quqyqbuzýshylyqtar boıynsha ákimshilik hattama toltyrdy:

— QR ÁQbK-niń 442 baby — Syrtqy jaryq túsirý qurylǵylaryn paıdalaný erejelerin buzý (maıachoktardy zańsyz ornatý);

— ⁠QR ÁQbK-niń 590 baby 1 bóligi — Memlekettik tirkeý nómirlik belgileri joq kólik quralyn basqarý;

— ⁠QR ÁQbK-niń 505 baby — Qalany abattandyrý qaǵıdalaryn buzý (ózen arnasyna kólikpen kirý);

— ⁠QR ÁQbK-nik 603 baby 1 bóligi — Kólik quraldaryn paıdalaný qaǵıdalaryn buzý;

— ⁠QR ÁQbK-niń 612 baby 2 bóligi — Kámeletke tolmaǵan adamnyń jol qozǵalysy erejelerin buzýy.

Sonymen qatar kámeletke tolmaǵan balanyń zańdy ókili retinde anasy da onyń tárbıesine tıisti deńgeıde mán bermegeni úshin jaýapkershilikke tartyldy. Avtokólik arnaıy aıyppul turaǵyna qoıyldy.

— Profılaktıka jyly aıasynda Almaty polıtsııasy zańdylyq pen jol qaýipsizdigin qamtamasyz etýge erekshe kóńil bóledi. Mundaı áreketter adam ómiri men densaýlyǵyna qaýip tóndiredi. Sondyqtan árbir adamnyń, ásirese ata-analardyń bala tárbıesi men tártibine jeke jaýapkershiligi mańyzdy. Eresekterdi mundaı quqyqbuzýshylyqtarǵa jol bermeýge shaqyramyz, — dedi Jergilikti polıtsııa qyzmeti basqarmasy bastyǵynyń orynbasary Tımýr Noǵaıbaev.

Eske salaıyq, buǵan deıin almatylyq júrgizýshiniń kóligimen Esentaı ózeninde júrgen vıdeosy taraǵanyn jazǵanbyz.