Esentaı ózeni ústindegi jaıaý júrginshiler kópiriniń qurylysy qashan aıaqtalady
ALMATY. KAZINFORM — Almatyda Esentaı ózeni arqyly ótetin jaıaý júrginshiler kópiriniń bir bóligi bıyl, al ekinshi bóligi kelesi jyly aıaqtalady.
Qalalyq máslıhattyń sessııasynda depýtat Saltanat Serikova 2021 jyldan beri ál-Farabı dańǵyly boıyndaǵy Esentaı ózeni ústindegi kópirdi qaıta jańǵyrtýǵa jyl saıyn qomaqty qarjy bólinetinin aıtty. Ákimdik 2023 jyly 2 mlrd teńgeden asa qarajatqa kelisimshart jasap, negizgi avtomobıl kópirin qaıta jańǵyrtý jáne eki bólek velo-jaıaý júrginshiler kópirin salý josparlanǵan. Kólik ótetin bóliginiń jumysy aıaqtalǵanymen, jaıaý júrginshiler kópirleri áli tolyq bitpegen. Bul jumystardyń aıaqtalý merzimi birneshe ret — 2023 jyldyń sońynan 2024 jylǵy jeltoqsanǵa, odan keıin 2025 jylǵy mamyr men maýsymǵa shegerilgen.
Depýtattyń sózinshe, qurylys úsh jylǵa sozylyp, qala turǵyndaryna aıtarlyqtaı qolaısyzdyq týǵyzyp otyr. Ol jyl sońyna deıin qandaı jumystar atqarylatynyn jáne jobanyń naqty qashan aıaqtalatynyn surady.
Almaty jol ınfraqurylymyn damytý basqarmasynyń basshysy Saǵyndyq Telibaev bul jobanyń úsh bólikten: negizgi kópirdi qaıta qurý jáne jeke eki jaıaý júrginshiler kópirin salýdan turatynyn túsindirdi.
— Biz negizgi kópirdiń qaıta jańǵyrtý jumysyn úsh aıda aıaqtap, ál-Farabı dańǵylyndaǵy qozǵalysty qaıta ashtyq. Al eki bólek jaıaý júrginshiler kópirin salý kezinde qoǵamdyq ókildermen birge qarap, jasyl jelekti kesýge týra kelgen soń jobany túzetý týraly sheshim qaldyq. Qazir jańartylǵan joba memlekettik saraptamadan ótip jatyr, ony 15 jeltoqsanda alamyz dep josparlap otyrmyz, — dedi basqarma basshysy.
Onyń aıtýynsha, oń jaq bette negizgi konstrýktsııa ornatylyp qoıǵan, bul bólikti jyl sońyna deıin ashý josparlanǵan. Al sol jaǵynda Esentaıdyń astymen dıametri 800 mm sý qubyry ótedi, ony qys mezgilinde kóshirý múmkin emes.
— Sol sebepti soltústik bóliktiń qurylysy shamamen 2026 jylǵy mamyrda aıaqtalady, — dedi ol.
Eske salaıyq, 2023 jylǵy qyrkúıekte ál-Farabı dańǵyly boıyndaǵy Esentaı ózeni ústindegi jańartylǵan avtomobıl kópiri ashylǵan edi. Jóndeý barysynda kópir keńeıtilip, jol bóligi segiz jolaqqa ulǵaıtyldy.