Esentaı Qalıev Oral qalalyq máslıhatynyń tóraǵasy bolyp saılandy

ORAL. QazAqparat – Búgin Oral qalalyq máslıhaty segizinshi shaqyrylymynyń birinshi sessııasy ótti, dep habarlaıdy QazAqparat tilshisi.

Sessııada Esentaı Ǵınııatuly Qalıev qalalyq máslıhattyń tóraǵasy bolyp saılandy.

Sondaı-aq qalalyq máslıhattyń turaqty komıssııalarynyń quramy men tóraǵalary bekitildi.

Esentaı Qalıev 1963 jyly 25 qazanda Batys Qazaqstan oblysynyń Jalpaqtal aýdany Jalpaqtal aýylynda dúnıege kelgen.

Bilimi – joǵary, Oral aýyl sharýashylyǵy tehnıkýmyn agronom, Oral pedagogıkalyq ınstıtýtyn geografııa pániniń muǵalimi mamandyǵy boıynsha bitirgen.

Eńbek jolyn №17 Fýrmanov orta kásiptik-tehnıkalyq ýchılışesinde bastap bastaýysh komsomol komıtetiniń hatshysy, agronomııa negizderi pániniń muǵalimi, Fýrmanov aýdany komsomol komıtetiniń ekinshi, úshinshi hatshysy, №17 Fýrmanov orta kásiptik-tehnıkalyq ýchılışesi dırektorynyń oqý-tárbıe jónindegi orynbasary, Jalpaqtal aýyldyq okrýginiń ákimi, Kaztalov aýdany ákiminiń orynbasary, K.Meńdálıev atyndaǵy orta mektep dırektory, Kaztalov aýdany ákimi apparatynyń basshysy, Kaztalov aýdanynyń ákimi sııaqty qyzmetterdi atqardy.

Sondaı-aq BQO tabıǵı resýrstar jáne tabıǵatty paıdalanýdy retteý basqarmasynda, oblystyq máslıhat apparatynda jumys istedi.

2021 jyldyń 15 qańtarynan beri Oral qalalyq máslıhatynyń hatshysy boldy.

Eske sala keteıik, budan buryn BQO strategııa jáne ekonomıkalyq damý basqarmasyna jańa basshy taǵaıyndalǵanyn jazǵan bolatynbyz.

Sondaı-aq Murat Muqaev BQO máslıhatynyń tóraǵasy qyzmetine saılandy.