Eseńgirep, sóıleı almady: Polıtseı 2 kún dalada túnegen balany qalaı tapqanyn aıtyp berdi
16 aqpanda Qaraǵandy oblysy Jańaarqa aýdanynyń polıtsııa bólimine 14 aqpanda qystaqtan 16 jasar jasóspirimniń shyǵyp ketip, qaıtyp oralmaǵany týraly habarlama túsken.
Atalǵan aqparat túsken sátten bastap polıtsııa qyzmetkerleri jedel-izdestirý sharasynyń tolyq keshenin uıymdastyryp, barlyq kúsh-quraldardy balany izdeýge jumyldyrdy.
Balanyń ata-anasy eki kún boıy óz kúshimen izdegen, alaıda odan nátıje bolmaǵan. Polıtseıler birneshe topqa bólinip, eki kúnnen beri habar-osharsyz ketken jasóspirimdi izdeýge kirisken.
Іzdeý sharalaryna Jańaarqa aýdany Bıdaıyq kentiniń ýchaskelik polıtsııa ınspektory Jubanysh Júnisbekov te jumyldyrylǵan.
Ýchaskelik polıtsııa ınspektory turatyn aýyl bala joǵalǵan Aqtaý aýylynan 150 shaqyrym qashyqtyqta ornalasqan.
Ýchaskelik polıtseı izdeýge úsh toptyń avtokólikpen attanǵanyn, al ol óziniń serigi Jańaarqa aýdanynyń PB ýaqytsha ustaý ızolıatorynyń qyzmetkeri Kamı Ýskenbaev ekeýiniń atpen shyqqanyn jetkizdi.
– Ol jerler taý-tasty bolǵandyqtan attarmen izdeý ońaıyraq boldy. Biz balanyń ata-anasynyń úıinde bolǵanda olardyń qanshalyqty úmitterin úzgenin kórdik, olar taný úshin balanyń kıiminiń qaldyǵyn nemese máıitin tabýdy surady. Dalalyqta qasqyrlar bar, al jasóspirim bala eki kúnnen beri jalǵyz, ony tiri kúıinde tabý ǵajaıypqa teń edi. Іzdeý jumystary tańda bastaldy. Keıbir jerlerde aıaq kıim izderi kezdesti, biraq izdeý jumystary bizge deıin de júrgizilgendikten, bul aýyl turǵyndarynyń izi bolýy ábden múmkin edi. Sondaı-aq joǵalǵan bala kamýflıajdy kıim kıgendikten, bul izdeý jumystaryn odan ári qıyndatty, – deıdi J. Júnisbekov.
Aýa raıy da balany tabý jumysyn qıyndatty, kún aıazdy ári jeldi bolǵanyn aıta ketý kerek.
Túnde aýa temperatýrasy óte tómen boldy, sondyqtan ýaqyt tyǵyz edi.
– Atpen júrip, ony atymen aıǵaılap shaqyrdyq. Biz óz jańǵyryǵymyzdy estip júrgendikten, qıyn boldy. Serigimiz ekeýmiz árbir tasty, shómeleni zerttedik, balany baıqamaı qalmaıtynymyzǵa senimdi bolýymyz kerek edi. Kesh batyp kele jatty, kún batqannan keıin munda izdeý múmkin emes bolatyn. Baılanys bolǵan joq, baǵdarymyzdan jańyldyq, alaıda biz qarańǵy batqansha izdeýdi jalǵastyra berdik. Tastaqta júrý attarǵa qıyn boldy, biz attan túsip, kezdesken shómeleni tekserýge bardyq. Sol jerde biz onyń kúrteshesin kórdik, – deıdi ýchaskelik polıtseı.
Jubanysh Júnisbekov sol sátte óz júreginiń dúrsilin estimeı qalǵanyn esine alady. Jaqyndap kelip, ol balanyń tiri ekenin baıqaǵan.
Jasóspirim yzǵarly jelden yqtasyn izdep, jerde tastardyń arasynda jatqan.
– Bizdiń qandaı kúıde bolǵanymyzdy aıtyp jetkize almaımyn. Ony kóterip alyp, qushaqtap, qol-aıaǵyn ysqyladyq, atyn atadyq. Bala únsiz turdy. Ol shok jaǵdaıynda boldy, sebebi ol bizdiń kim ekenimizdi, ony qalaı tapqanymyzdy túsinbeı turdy. Alǵashqy jarty saǵatta biz oǵan bir aýyz sóz de aıtqyza almadyq. Ol tipti qorqyńqyrap turdy. Artynan ol bizdi gallıýtsınatsııa eken dep oılaǵanyn aıtty, – dedi Jubanysh.
Jasóspirim óziniń dalalyqta adasyp qalǵanyn jáne aınalshyqtap uzaq júrgenin aıtty.
Ol tek túnde ǵana sharshaǵandyqtan ári tońǵandyqtan shómelege kirip jylynbaq bolǵan, alaıda oǵan jan-jaqtyń bárinen qasqyrdyń ulyǵany estilip turǵan.
Ol jabaıy ańdardan qorqyp júre bergen jáne jaqyn arada óz betimen úıine jete almaıtynyn tez túsingen.
– Ol esin jıǵan kezde jylap, pogondarymdy sıpalap, rahmet aıta bastady. Men forma kıip alǵan bolatynmyn jáne ony tapqan kezde men oǵan pogonym men arqamdaǵy «Polıtsııa» degen jazbany kórsetip, ózin izdep júrgenimizdi túsindirgen edim, – deıdi ýchaskelik polıtsııa ınspektory.
Tabylǵan balany atqa mingizip, olar tezdetip aýylǵa bet alǵan.
– Biz aýylǵa kele jatqanda ony kúldirýge tyrystyq, ázilder men ómirde bolǵan kúlkili jaıttardy aıttyq. Biz ony tezirek qalpyna keltireıik dedik. Qorqynyshty jaıttyń bitkenin jáne onyń ómirine endi qaýip joq ekenin sezingenin qaladyq. Al beınejazbany ózimizdiń baqytty sátimizden estelik úshin túsirdik. Beınejazbany áriptesterime kórsettim, olar basshylyqqa bergen. Men beınejazba bulaı tez taralady dep oılaǵan joqpyn, – deıdi ol.
Tártip saqshylarynyń aıtýynsha, jasóspirimdi úıine jetkizgen kezde anasy ony qushaǵynan kópke deıin shyǵarmaǵan.
Jańaarqa aýdanynyń Bıdaıyq aýylynyń ýchaskelik polıtsııa ınspektory
Jubanysh Júnisbekov polıtsııada 2009 jyldan beri qyzmet atqarady. Kelinshegimen birge úsh qyz tárbıelep otyr, onyń eń kishisi eki jasta ǵana.
Onyń sózinshe, áriptesteri ony «joly bolǵysh jigit» dep te ataıdy eken, sebebi ol júrgizgen izdeý jumystarynyń basym bóligi nátıjeli bolǵan.