Esbol Sultanovtyń bapkerligi Qazaqstanda nege laıyqty baǵalanbady — Federatsııa basshysynyń jaýaby

ASTANA. KAZINFORM — Qazaqstan taekvondo federatsııasynyń prezıdenti Qudiret Shámıev ulttyq quramanyń bas bapkeri Esbol Sultanovtyń álemdegi reıtıngi týraly pikir bildirdi.

— Dúnıejúzilik taekvondo federatsııasynyń 2024 jylǵy reıtınginde birinshi bolǵan Esbol Sultanov qazir ulttyq quramanyń bas bapkeri bolyp otyr. Ol bir kezderi Týnıske ketip qalǵan bolatyn. Sol eldiń tarıhyn jańartyp, eki olımpıada medalin alyp berdi. Endi keıde ondaı mamandar syrtqa shyqqanda baǵalanyp jatady. Biz federatsııaǵa kelgende ony birden shaqyrdyq. Biraq odan buryn Prezıdent Qasym-Jomart Toqaevtyń Joldaýynda osy Esbol Sultanovtyń aty atalǵan bolatyn. Ózimizdiń talanttar turǵanda ózge eldiń mamandaryna júginý durys emes. Sondyqtan qazir ol ózimizde bas bapker, — dedi ol Jibek Joly telearnasyndaǵy «Ýáde» baǵdarlamasynda.

Onyń sózinshe, Esbol Sultanovtyń qasyna Iran men reseıden bilikti bapkerler toptastyrylǵan.

— «Kelisip pishken ton kelte bolmaıdy» deıdi, sol úshin Irannyń qyzdar quramasynda bas bapker bolǵan Fatıma hanymdy qosymsha bapker etip shaqyrttyq. Reseıden álem jáne olımpıada chempıonyn shyǵarǵan Aleksandr myrzany aldyrdyq. Osynda ujym birlesip jumys istep jatyr, — dedi Qudiret Shámıev.

Buǵan deıin 24-30 qazan kúnderi Qytaıdyń Ýsı qalasynda ótetin álem birinshiligine Qazaqstan atynan qaı taekvondoshylar qatysatynyn jazǵan edik.