Esbol Sultanov: elimizge tarıhı medal syılaý basty armanym

ASTANA.KAZINFORM — Taekvondodan Qazaqstan ulttyq quramasynyń bas bapkeri Esbol Sultanov Kazinform tilshisine bergen suhbatynda, elimizdegi taekvondo sportynyń damýy jaıynda sóz qozǵady.

Ulttyq qurama bas bapkeri daıyndyq deńgeıi jáne kemshilikter týraly aıtty.

— Daıyndyq jaqsy deńgeıde ótti. Alaıda syrtta júrgende keıbir jetpeı jatqan kemshin tustar kórindi. Olardyń qatarynda, daıyndyq barysy jáne baǵdarlamalary, sonymen qatar ishki jarystar bar. Qazirgi ýaqytta, federatsııa basshylyǵymen barlyq ishki jarystardy rettep, sportshylardyń arasyndaǵy básekelestikti arttyrýǵa at salysyp jatyrmyz. Bul bapkerler úshin óte mańyzdy. Sebebi ulttyq qurama sportshylary men jas sportshylardyń deńgeıin qaraýymyz kerek, — dedi ol.

Sultanovtyń aıtýynsha, elimizde talantty jas sportshylar kóp.

— Sportshylar týraly aıtar bolsam, talantty jastar bar. Sportshylarymyz jaqynda ótken Ýnıversıada oıyndary, Azııa jáne Álem chempıonatynda jaqsy óner kórsetti. Shetelde, onyń ishinde Týnıste bas bapker bolyp jumys istedim. Armanym, elimizden chempıondar shyǵaryp, tarıhı jeńiske qol jetkizý, — dedi bapker.

Aıta keteıik, 14–16 tamyz aralyǵynda Jaqsylyq Úshkempirov atyndaǵy Jekpe-jek saraıynda eresekter, jasóspirimder jáne kadetter arasynda taekvondodan Kazakhstan Open 2025 (G-1) halyqaralyq reıtıngilik týrnıri ótedi.