Erjan Tátishev qorynyń bilim berý granty baıqaýyna qujattar qabyldaý merzimi uzartyldy
ALMATY. 31 naýryz. QazAqparat - Erjan Tátishev qory mektep jáne kolledj túlekterine, sondaı-aq múgedektigi bar jastarǵa arnalǵan 2012 jylǵy bilim granttary baıqaýyna qujattar qabyldaý rásimin 13 sáýirge deıin uzartty.
23 qańtarda jarııalanǵan baıqaý sharty boıynsha qarjy-ekonomıkalyq mamandyqtary boıynsha bakalavr dárejesin alýǵa nıettengen jastar 31 naýryzǵa deıin óz qujattaryn tapsyrýy kerek bolatyn. Qoǵamdyq qordyń bul baǵdarlamasynyń basty maqsaty - kóshbasshylyq qabiletteri jáne jańa bilimder men mashyqtardy meńgerýge yntaly jastardy anyqtap, olarǵa járdem berý. Sonymen qatar belsendi ómirlik ustanymy bar jáne qarjylyq-ekonomıkalyq mamandyqtarǵa ıe bolýǵa múddeli jas múgedekterdi tabý jáne kómektesý. Onda mektepter men kolledjderdiń túlekteri Qazaqstan menedjment, ekonomıka jáne boljaý ınstıtýtynda, Halyqaralyq bıznes ýnıversıtetinde jáne Halyqaralyq bıznes akademııasynda bilim ala alýǵa múmkindik alady. Oǵan qazaqstandyqtarmen qatar, TMD elderindegi Ázirbaıjan, Armenııa, Belarýs, Grýzııa, Qyrǵyzstan, Reseı, Tájikstan jáne Ýkraına azamattary da qatysa alady. Úmitkerlerdi irikteýde balalar úıiniń túlekterine artyqshylyqtar beriledi. Al Qazaqstannyń túrli aımaqtaryndaǵy arnaıy-orta oqý oryndarynda bilim alýǵa ata-analary bilim alý shyǵyndaryn tóleı almaıtyn otbasylardyń múgedektigi bar tek Qazaqstan azamattary ǵana qatysa alady. Baıqaýdyń jalpy erejesimen tanysyp, ótinim formasy men qujattar tizimin jáne bilim granttarynyń baǵdarlamasy jónindegi tolyq aqparattar www.tatishevfoundation.kz saıtynda ornalastyrylǵan. Mundaı málimetterdi baǵdarlamanyń seriktes joǵary oqý oryndarynyń qabyldaý bólimderinen de alýǵa bolady.
