Erjan Maıamerov - Qazaqstan musylmandary Dinı basqarmasynyń tóraǵasy
ASTANA 19 aqpan. QazAqparat - Elordada ótip jatqan Qazaqstan musylmandary VII quryltaıynda Qazaqstan musylmandary Dinı basqarmasynyń tóraǵasy bolyp Erjan Maıamerov saılandy.
Alqaly jıyn barysynda onyń kandıdatýrasyn «Áziret Sultan» meshitiniń Bas ımamy Qaırat Joldybaıuly usynyp, ol delegattar tarapynan biraýyzdan qoldaý tapty. Osydan keıin jańa Bas múftı óziniń orynbasarlary laýazymyna "Áziret Sultan" meshitiniń bas ımamy Q. Joldybaıuly men Qostanaı oblysy boıynsha ókil ımam Serik Orazdy usyndy. Bul usynys ta delegattar tarapynan qoldaý tapty.
Esterińizge sala keteıik, E. Maıamerov Semeı óńiriniń týmasy. Ol Mysyrdaǵy Ál-Ázhar ýnıversıtetin támámdaǵan. Atalǵan memlekette 15 jyl boıy dinı bilimin shyńdaǵan ol elimizge oralǵannan keıin Bas múftı sheıh Ábsattar qajy Derbisáli hazirettiń buıryǵymen Qazaqstan musylmandary dinı basqarmasynyń Semeı aımaǵy boıynsha ókil ımamy bolyp taǵaıyndalǵan edi.
Erjan MAıAMEROV 1972 jyly 16 jeltoqsanda týǵan. 1990 jyly Shyǵys Qazaqstan oblysynyń Maqanshy aýdanynda Ǵanı Muratbaev atyndaǵy orta mektepti bitirgennen keıin QR Qarýly Kúshterinde áskerı paryzyn ótedi. 1993 jyly Egıpettegi búkilálemdik ál-Azhar ýnıversıtetiniń «Zań jáne sharıǵat» fakýltetine qabyldandy. Ál-Ázhar ýnıversıteti álemdegi baıyrǵy jáne bedeldi musylman dinı-rýhanı bilim ordalarynyń biri. Onyń 12 jyldyq tolyq kýrsynan ótip, ýnıversıtetti 2006 jyly bitirdi. 2006-2008 jyldary Egıpet múftıliginde óziniń bilimin odan ári shyńdady.
2011 jylǵy 10 qazanda Bas múftı Ábsattar qajy Derbisáli hazirettiń usynysymen Qazaqstan musylmandary dinı basqarmasynyń Semeı aımaǵy boıyna ókil ımamy qyzmetine taǵaıyndaldy, oǵan deıin Semeı qalasynyń Mırnyı kentinde Dalanbaı ata meshitinde ımam boldy. Birneshe tilderdi meńgergen, dinı máseleler jónindegi BAQ-ta jarııalanǵan kóptegen maqalalardyń avtory.
