Erjan Maksımniń ata-anasy Máskeýdegi QR Elshiligine qyzmetke shaqyrtyldy
«Máskeýdegi QR Elshiligi Erjannyń ata-anasyn jumysqa shaqyrdy. Árıne, bul qadam Erjannyń oqýy úshin óte mańyzdy. Ózderińiz bilesizder, jas daryndy Igor Krýtoı shaqyrtqan bolatyn», - dedi Mádenıet jáne sport mınıstri Arystanbek Muhamedıuly elordada ótken baspasóz máslıhatynda.
Mınıstr balanyń bolashaǵy úshin Erjannyń ata-anasy Máskeýge barýǵa bel býǵanyn jetkizdi. Ázirge, onyń ata-anasyna qandaı qyzmet usynylǵany belgisiz.
«Qazir usynylatyn qyzmet týraly eshteńe aıta almaımyz. Meniń oıymsha, elshilikte kez kelgen jumys qurmetke ıe», - dedi A. Muhamedıuly.
Eske sala keteıik, Reseıdiń halyq ártisi, kompozıtor ári prodıýser Igor Krýtoı qazaqstandyq jas ánshi Erjan Maksımge óziniń mýzykalyq akademııasyna oqýǵa túsip, bilimin shyńdaýdy usyndy.
«Dostar, Máskeýge jasaǵan saparym sátti boldy. Nege deısiz ǵoı. Men eń aldymen, elimizdiń atpal azamaty Imanǵalı Nurǵalıulymen kezdestim. Sol kezdesýimizdiń nátıjesi retinde kópten beri armandap júrgen ataqty kompozıtor, prodıýser Igor Krýtoımen tanystym. Stýdııada tyńdaǵan maestro meni unatyp, óziniń mýzykalyq akademııasyna shaqyrdy. Men qýana kelistim. Endi, dostar, kúzden bastap sol jerde vokal baǵyty boıynsha ónerimdi shyńdaıtyn bolamyn. Árıne, munyń barlyǵy Imanǵalı aǵamyzdyń arqasy dep bilemin. Osyndaı azamattardyń arqasynda shyǵarmashylyǵym jalǵasyp, jemisin beretinine senimim mol», - dep jazdy Erjan.
