Erjan Maksımniń anasy atyshýly jarnamaǵa qatysty pikir bildirdi

«Kastıngke kelgen sátten fınalǵa deıin bárimiz dos bolyp keldik, birge oınadyq, birge daıyndaldyq. Birge án aıttyq, qazir de dos bolyp qaldyq. Jalpy «Golos. Detı» baıqaýy qatty unady. Arasynda qıynshylyqtan da ótip turý kerek», - dedi Erjan Makısm elordada balalar úıinde ótken kezdesýde.

Sonymen birge, jas ánshiniń anasy Gúlmıra Álibek Erjan túsken atyshýly jarnamany túsindirip berdi.

«Ótkende qurylys kompanııasynyń jarnamasyna tústik. Stsenarıı boıynsha, Erjan birinshi qabattaǵy qyzǵa ǵashyq bolyp, sol qabattan páter suraıdy. Biraq, ondaǵy páterler satylyp ketken. Osynyń bárin adamdar Birinshi arnaǵa burmalap, repost jasap ketti. Jarnamanyń Birinshi arnaǵa esh qatysy joq. Bizdiń arnany ájýalaıtyn oıymyz da bolmady. Eshkimdi kinálamaımyz, eshkimge aıyp joq. Bári jaqsy», - dedi G. Álibek.

Ánshiniń anasy Erjan men Mıkella Abramovanyń «Jańa tolqyn» balalar baıqaýynyń ashylýynda án shyrqaǵanyn atap ótti.

«Erjan men Mıkellany qarsylas, biriniń ornyn biri tartyp aldy degen qaýeset bar. Mundaı áńgimeniń balalarǵa qatysy bolmaýy kerek. Balalar shyǵarmashylyq ómirde birge, tatý-tátti dos. Balalardyń esh kinási joq. Olar tek qana óz arman-maqsattaryna umtyla berýi kerek. «Jańa tolqyndaǵy» dýetti kórermen óte jaqsy qabyldady, án aıtyp bolan soń 5 mınýt boıy «Molodtsy!» dep qoshemettedi. Sonda ózimizdi baqytty sezindik», - dedi Erjannyń anasy.

Olardyń aıtýynsha, 28 maýsymda elordada ótetin Erjannyń jeke kontsertine Mıkella Abramovanyń qatysýy boıynsha kelissózder júrip jatyr. Odan bólek, Sáken Maıǵazıev, Ulyqpan Joldasov, Renat Ǵaısın, Móldir Áýelbekova, Aıqyn Tólepbergen syndy belgili ánshiler kesh qonaqtary bolmaq. Kontsertti QR Mádenıet jáne sport mınıstrligi uıymdastyrady.

Buǵan deıin Erjan Maksım Reseıdiń Birinshi arnasynyń «Golos. Detı» konkýrsynyń jeńimpazy atanǵan edi.