Erjan Maksım túngi ekide Almatyǵa ushyp keledi
NUR-SULTAN. QazAqparat – 26 qarasha kúni túnde Erjan Maksım Almatyǵa ushyp keledi, dep habarlaıdy QazAqparat tilshisi.
«Dostar! Búgin túngi 02:45-te Almaty áýejaıyna Erjan Maksımmen birge qazaqstandyq delegatsııa ushyp keledi. Jeńimpazymyzdy qushaq jaıa kútip alaıyq. Barlyǵyńyzdy áýejaıda kútemiz», - dep jazdy ánshiniń fan-klýbynyń Instagram paraqshasynda.
Mádenıet jáne sport mınıstrligi jas ánshiniń dál sol ýaqytta ushyp keletinin rastap otyr.
Buǵan deıin QR Prezıdenti Qasym-Jomart Toqaevtyń Erjan Maksımdi án baıqaýyndaǵy júldesimen quttyqtaǵany habarlanǵan bolatyn. Kók týdy jelbiretken jas ánshini Dımash Qudaıbergen de quttyqtap, Instagram paraqshasynda «Qulynshaq, jeńisiń qutty bolsyn! Ekinshi oryn emes, men úshin birinshi oryn dep bilemin!!! Jaraısyń balapan!!!» dep jazdy.
Óz kezeginde Erjan Maksım qazaqstandyqtarǵa alǵysyn aıtty.
«Qurmetti dostarym, apa-aǵalarym, ata-ájelerim. Maǵan daýys bergenderińiz úshin kóp-kóp rahmet! Osy jeńiske sizderdiń arqalaryńyzda jetip otyrmyn», - dep jazdy ánshi.
Eske sala ketsek, Polshada ótken «Junior Eurovision-2019» án baıqaýynda baq synaǵan qazaqstandyq Erjan Maksım ekinshi oryn alǵan bolatyn. Qazylardyń bergen baǵasy boıynsha Erjan Maksım birinshi oryn aldy. Al onlaın daýys berý qorytyndysymen 79 upaı jınady. Osylaısha qazaqstandyq ánshi jalpy 227 upaımen ekinshi oryn boldy. Baıqaýdyń bas júldesin 278 upaı jınaǵan Polsha ókili Vıkı Gabor jeńip aldy.
