Erjan Maksım qatysqan «Golos.Detı» baıqaýynyń nátıjesi joqqa shyǵaryldy
NUR-SULTAN. QazAqparat - Reseıdiń Birinshi arnasy «Golos. Detı» baıqaýynyń altynshy maýsym nátıjesin qaıta qarap, joqqa shyǵardy. QazAqparat TASS agenttigine silteme jasaı otyryp habarlaıdy.
«Golos. Detı» baıqaýynyń daýys berý nátıjelerine tekserý júrgizgen Group-IB kompanııasy qatysýshylardyń birine avtomatty túrde SMS-daýystar joldanǵanyn buǵan deıin tirkegen bolatyn.
«Aralyq tekserýler daýys berý protsesine syrttan yqpaldyń bolǵanyn rastady. Sońǵy esep mamyr aıynyń sońynda belgili bolady. Alaıda, Birinshi arna bıylǵy maýsym nátıjelerin qazirden joqqa shyǵarý jóninde sheshim qabyldady» - delingen aqparatta.
Atalmysh arna baıqaýǵa daýys berý sharalarynyń qaýipsizdigin kelesi maýsymǵa deıin jetildiretinin málimdep otyr. Al Altynshy maýsym nátıjeleri joqqa shyǵarylǵandyqtan, 24 mamyrda aqtyq synǵa qatysýshylardyń arnaıy shyǵarylymy bolady.
Eske salsaq, 11 jastaǵy oraldyq ónerpaz Erjan Maksım atalmysh konkýrsta Valerıı Meladzeniń komandasynda óner kórsetip, ekinshi oryn ıelengen bolatyn.
