Erjan Maksım «Junior Eurovision» baıqaýynda aıtatyn ánine klıp túsirip jatyr
ALMATY. QazAqparat - Daryndy jas ánshi, «Golos detı» reseılik telejobasynyń jeńimpazy Erjan Maksım «Junior Eurovision» halyqaralyq án baıqaýynda aıtatyn ánine klıp túsirip jatyr. Bul týraly QazAqparat «Habar 24» arnasyna silteme jasap habarlaıdy.
Beınebaıan Almaty qalasynyń kórikti jerleri men Abaı atyndaǵy opera jáne balet teatrynda túsirilýde.
«Junior Eurovision» baıqaýynyń sharty boıynsha qatysýshylar esh jerde jarııalanbaǵan 3 mınýtqa deıingi kompozıtsııany tabıǵı daýysta oryndaýy qajet.
«Ánim ózime qatty unady. Kórermenderge, Qazaqstan halqyna unaıdy dep oılaımyn. Jaqynda tyńdap baǵasyn beresizder. Tehnıkalyq jaǵynan qıyndyǵy bar. Daýys kóteretin jerler de bar. Aýyr óleń dep aıtýǵa da bolady. Maǵan ózime negizi sondaı ánder unaıdy», - deıdi Erjan Maksım.
Klıptiń avtory – ýkraınalyq rejısser Aleksandr Flomboım. Qoıýshy –operatory kóptegen qazaqstandyq ánshilerge beınebaıan túsirgen maman Stanıslav Ilın. Beınebaıannyń mazmuny jaqsylyq, asqaq armandardyń oryndalýy jaıynda.
«Bul – Erjannyń alǵashqy klıpi. Erjan ózin túsirilim alańynda erkin ustaıdy. Kameradan qoryqpaıdy. Ánniń mazmunyn ashyp, tyńdarmanǵa jetkizý úshin barymyzdy salýdamyz», - dedi qoıýshy-operator Stanıslav Ilın.
Túsirilim protsesi barysynda ánshiniń anasy Gúlmıra Álibek – únemi janynda. «Keshe semkamyz saǵat 5-6-da bastalǵan bolatyn. Búgin tańǵy 6-7-ge deıin túsirilimde boldy. Erjan endi kishkentaı bala. Qatty sharshaıdy. Kútimi kerek arasynda. Óte úlken jaýapkershilik. Erjan kishkentaı bolsa da, onyń bárin túsinip, bilip júr. Qobaljyp júr. Bar kúshin salyp, daıyndalyp jatyr», - dedi ol.
«Junior Eurovision» halyqaralyq balalar án baıqaýy 24 qarasha kúni Polshanyń Glıvıtse qalasynda bastalady. Jerlesimiz Erjan Maksım qatysatyn jas ánshiler jarysyn «Habar» telearnasy kórsetedi.
