Erjan Maksım baıqaý kezindegi tosyn oqıǵalar týraly aıtyp berdi
«Qazaqstanǵa, óner súıer qaýymǵa úlken syı alyp kelgen – kishkentaı Erjan balamyzdy quttyqtaımyz. Osyndaı jetistikterge jete ber. Júzden júırik shyqqanyńa myń da bir alǵys. 3 mıllıonnan astam adam daýys beripti (...) Osyndaı jetistikter bir mezgilde bolmaıdy. Bul – úlken jumystyń nátıjesi. Otbasynyń, eliniń qoldaýynyń, Erjannyń eńbekqorlyǵynyń nátıjesinde ulymyz osyndaı jeńiske jetti. Bızneste júrgen, áleýmettik jaýapkershilikti sezingen azamattarymyz da kómektesti. Memleketten qarjy da bólindi. Sondyqtan, bizdiń elimizdiń týyn, mártebesin kótergeniń úshin saǵan kóp rahmet», - dedi Aqtoty Raıymqulova.
Óz kezeginde Erjan Maksım baıqaý kezinde basynan ótken qyzyqty oqıǵalardy aıtyp berdi.
«Meni qolpashtap, osylaı qurmet kórsetip jatqanyńyzǵa kóp rahmet! Baıqaýda óte qıyn boldy. Biraq, eń qyzyǵy baıqaýda meniń qulaǵyma qulaqqap syımaı qaldy. Sosyn skotchpen qulaǵyma jabystyryp tastadym. Taǵy da kóp qyzyqtar boldy. Balalardyń bári keshke qaraı birge kóńil kóterip, vals bıledik. Qarsylastarym óte myqty boldy. Tamaq jaqpaı, ernime ushyq shyǵyp, áreń ketirdim», - deıdi Erjan Maksım.
Eske sala ketsek, Polshada ótken «Junior Eurovision-2019» án baıqaýynda baq synaǵan qazaqstandyq Erjan Maksım ekinshi oryn alǵan bolatyn. Qazylardyń bergen baǵasy boıynsha Erjan Maksım birinshi oryn aldy. Al onlaın daýys berý qorytyndysymen 79 upaı jınady. Osylaısha qazaqstandyq ánshi jalpy 227 upaımen ekinshi oryndy enshiledi. Baıqaýdyń bas júldesin 278 upaı jınaǵan Polsha ókili Vıkı Gabor jeńip aldy.
Aıta ketsek, buǵan deıin QR Prezıdenti Qasym-Jomart Toqaevtyń Erjan Maksımdi án baıqaýyndaǵy júldesimen quttyqtaǵany habarlanǵan bolatyn. Óz kezeginde Erjan Maksım qazaqstandyqtarǵa alǵysyn aıtty.
«Qurmetti dostarym, apa-aǵalarym, ata-ájelerim. Maǵan daýys bergenderińiz úshin kóp-kóp rahmet! Osy jeńiske sizderdiń arqalaryńyzda jetip otyrmyn», - dep jazdy ánshi instagram-da.
