Erjan Maksım «Alla Pýgachevanyń Altyn juldyzy» syılyǵyn ıelendi
NUR-SULTAN. QazAqparat - «Golos. Detı» jobasynyń altynshy maýsymynyń júldegeri, 11 jasar qazaqstandyq Erjan Maksımge Alla Pýgacheva «Alla Pýgachevanyń Altyn juldyzy» syılyǵyn tabys etti, dep habarlaıdy QazAqparat.
Alla Pýgacheva kezdesýge tórt fınalıst - Erjan Maksım, Robert Bagratıan, Nıno Chesner jáne Anastasııa Ivanovany shaqyrdy. Kezdesýden estelikterdi joba tálimgerleriniń biri Svetlana Loboda Instagramdaǵy paraqshasynda jarııalap, Alla Pýgachevaǵa balalardy qoldaǵany úshin alǵys aıtty.
«Alla Pýgachevanyń Altyn juldyzy» syılyǵy - 2005 jyldan bastap jyl saıynǵy jas talantty ánshilerge, mýzykanttarǵa beriledi.
Esterińizge sala keteıik, oraldyq Maksım Erjan kórermenderdiń daýys berý nátıjesi boıynsha, «Golos. Detı» jobysynyń fınalynda ekinshi oryndy ıelengen bolatyn. Erjan Maksım Valerııa Meladze komandasynyń atynan óner kórsetti. Fınalda qazaqstandyq Erık Karmena All by Myself jáne Laranyń Fabıan Adagio ánderin oryndady
Baıqaýdy kórermenderdiń 56, 5% daýysyn jınaǵan reseılik tanymal ánshi Alsý men bıznesmen ıAna Abramovtyń qyzy Mıkella Abramova jeńip aldy. Al Erjan Maksım 27,9% daýys jınady.
Buǵan deıin habarlanǵandaı, qazaqstandyq jas oryndaýshylar Danelııa Tóleshova men Erjan Maksım búgin Qazaqstan halqy Assambleıasynyń XXVII sessııasyna arnalǵan kontsertke qatysady.
Sonymen qatar, Reseı Mýz-TV telearnasynyń bas dırektory Arman Davletıarov «Golos. Detı» baıqaýynyń fınalısi Erjan Maksımdi 7 maýsymda Máskeýde ótetin MÝZ-TV 2019 syılyǵyn tabys etý rásiminde óner kórsetýge shaqyrdy. Sondaı-aq onda qazaqstandyq ánshi Dımash Qudaıbergen de óner kórsetpek.
