Erjan Qazyhan: Qazaqstan AQSh bıznesine Ortalyq Azııadaǵy senimdi ınvestıtsııalyq platforma usynady
ASTANA. KAZINFORM — Qazaqstan AQSh kompanııalarymen ınvestıtsııalyq, ónerkásiptik jáne tehnologııalyq áriptestikti keńeıtýge daıyn. Bul týraly Astanada ótip jatqan Qazaqstan–AQSh iskerlik dóńgelek ústelde QR Prezıdentiniń AQSh-pen ózara is-qımyl jónindegi arnaıy ókili Erjan Qazyhan aıtty.
Onyń sózinshe, Qazaqstan men AQSh arasyndaǵy saıası dıalog endi naqty ınvestıtsııalyq sheshimderge, birlesken óndiristik jobalarǵa jáne uzaqmerzimdi kommertsııalyq baılanystarǵa ulasýy kerek.
— Qazaqstan amerıkalyq bızneske Ortalyq Azııadaǵy senimdi platforma usynyp otyr. Qazirgi tańda elimiz saıası jáne ekonomıkalyq jańǵyrýdyń aýqymdy kezeńinen ótip jatyr. Bul protsess ashyq, básekege qabiletti jáne ınvestorlar úshin qolaıly ekonomıkany qalyptastyrýǵa baǵyttalǵan. Biz demokratııalyq ınstıtýttardy damytýǵa, zań ústemdigin qamtamasyz etýge, adam quqyqtaryn qorǵaýǵa jáne tepe-teńdik júıesin nyǵaıtýǵa erekshe mán beremiz. Zań ústemdigi men quqyqtyq tártip qaǵıdaty ishki saıasatymyzdyń negizgi ustanymdarynyń birine aınaldy, — dedi Erjan Qazyhan.
Arnaıy ókildiń aıtýynsha, búginde elimizde 600-den astam amerıkalyq kompanııa jumys isteıdi, al AQSh-tan tartylǵan ınvestıtsııa kólemi Qazaqstan men Amerıka arasyndaǵy ekonomıkalyq baılanystyń tereńdigin kórsetedi.
— Chevron men ExxonMobil álemdegi eń qýatty ári senimdi energetıkalyq áriptestiktiń birin qalyptastyrdy. Honeywell sekildi kompanııalar ónerkásiptik damýǵa úles qosyp keledi. Al Microsoft, Amazon jáne Google sııaqty tehnologııalyq kóshbasshylar Qazaqstannyń tsıfrlyq transformatsııasyna belsendi qatysyp otyr. Qazir bizdiń strategııalyq kún tártibimiz keńeıip keledi. Jańa kezeńde ónerkásip, tsıfrlyq ekonomıka, jasandy ıntellekt, krıtıkalyq mıneraldar, aýyl sharýashylyǵy jáne kólik-logıstıka salalaryndaǵy yntymaqtastyqty tereńdetýge nıettimiz, — dedi ol.
Erjan Qazyhan Qazaqstannyń jasandy ıntellekt pen tsıfrlyq ekonomıka baǵytynda óńirlik kóshbasshylyqqa umtylyp otyrǵanyn aıtty. Osy rette ol Ekibastuzdaǵy derekterdi óńdeý ortalyǵy jobasyn jáne amerıkalyq kompanııalarmen jasalǵan kelisimderdi mysalǵa keltirdi.
Sonymen qatar Qazaqstan AQSh naryǵyna ýran, tıtan jáne basqa da mańyzdy shıkizat jetkizýshilerdiń biri bolyp otyr. Arnaýly ókildiń aıtýynsha, endigi mindet — geologııalyq áleýetten joǵary tehnologııalyq óndiris pen qosylǵan quny joǵary jobalarǵa kóshý.
— Bizdiń maqsatymyz — saıası yqpaldastyqty naqty kommertsııalyq nátıjege aınaldyrý. Qazaqstan amerıkalyq kompanııalardy jańa alıanstar qurýǵa, birlesken jobalardy iske asyrýǵa jáne eki eldiń ekonomıkalyq ósimine úles qosýǵa shaqyrady, — dedi Erjan Qazyhan.
Erjan Qazyhannyń aıtýynsha, Qazaqstan men AQSh arasyndaǵy baılanys tek ınvestıtsııa aǵynyn qamtamasyz etip qana qoımaı, eki el halqynyń ózara qarym-qatynasyn, týrızmdi jáne iskerlik áriptestikti de nyǵaıta túspek.
Sonymen qosa dóńgelek ústelde Qazaqstannyń ınvestıtsııalyq múmkindikteri, kólik-logıstıka, jańa energetıka, ónerkásiptik kooperatsııa jáne damý ınstıtýttarynyń jobalary tanystyryldy.
Aıta keteıik, AQSh Qazaqstan ekonomıkasyna 60 mlrd dollardan astam ınvestıtsııa saldy.
