Erjan Baıtanaev: «Stels-omıkron» shtamynan qorǵanýdyń jalǵyz joly - revaktsınatsııa

NUR-SULTAN. QazAqparat – QR Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń resmı ókili Erjan Baıtanaev «Atameken-business» arnasynyń efırinde «Stels-omıkron» shtamynan qorǵanýdyń jalǵyz joly vaktsınatsııa men revaktsınatsııa ekenin aıtty, dep habarlaıdy QazAqparat tilshisi.

«Koronavırýstyń jańa túri «Stels-omıkron» Qytaıda beleń ala bastady. Sonyń áserinen Shanhaıda túrli saladan 2000-ǵa jýyq medıtsına qyzmetkeri tartylyp, qala turǵyndaryn testileýden ótkizip jatyr. Bul shtamm bizge kelýi múmkin be?», - dep surady jýrnalıst.

«Barshańyzǵa aıan, elimizde jalpy epıdemıologııalyq ahýal turaqty. Kúnine 20-ǵa jýyq adam koronavırýs ınfektsııasyna shaldyǵýda. Bul neniń áseri? Bizde qazirgi ýaqytta ujymdyq ımmýnıtettiń bar ekeni ózderińizge aıan. 10,5 mıllıonǵa jýyq azamat tolyq vaktsınalaýdan ótti. Sonymen qatar, 3,5 mln azamat revaktsıantsııadan ótti. Áýel basta aıtqanymyzdaı, biz koronavırýs ınfektsııasymen ómir súrýimiz kerek, saqtanýymyz kerek. Iá, vedomstvoaralyq komıssııanyń sheshimimen, bas sanıtarlyq dárigerdiń qaýlysy boıynsha búginde búkil talaptar alynyp tastaldy. Soǵan qaramastan, biz azamattarǵa eń birinshi adam kóp toptasqan oryndarda maska taǵýǵa keńes beremiz. Eger vaktsınatsııadan, revaktsınatsııadan bas tartsaq, jaǵdaı ýshyǵyp ketýi múmkin. Búgingi jetistigimiz – 10,5 mln adamnyń sanaly túrde vaktsınatsııadan ótkeni, ujymdyq ımmýnıtettiń qalyptasqany», - dedi komıetttiń resmı ókili.

Onyń aıtýyna qaraǵanda, epıdemıologııalyq ahýaldyń turaqtanýy budan bylaı ujymdyq ımmýnıtetti saqtaýdyń qajeti joq degendi bildirmeıdi.

«Kóp adam karantın shekteýleri alynyp tastalǵanyn «vırýsty jeńdik, endi vaktsına almasam da bolady» dep túsinip jatyr. Bul úlken qatelik. Osydan bir jyl buryn, tipti jarty jyl buryn vaktsına alǵan adamdar revaktsınatsııadan ótpegen jaǵdaıda mýtatsııalyq shtamdar elge kelgen kezde birinshi juqtyrýy múmkin. Dúnıejúzilik densaýlyq saqtaý uıymynyń málimeti boıynsha, búginde «Stels-omıkron» shtamynan qutqaratyn birden-bir jol, juqtyrǵannyń ózinde jeńil ótkerýdiń joly – vaktsınatsııa men revaktsıantsııa. Vaktsına alsaq qana biz vırýsty juqtyrǵannyń ózinde aýrýhanaǵa túspeımiz, jasandy tynystandyrý apparatyna tańylmaımyz. Búginde azamattarymyz sanasyn oıatyp, mindetti túrde revaktsınatsııadan ótýi kerek. Qolda bar ujymdyq ımmýnıtetti saqtap qalýymyz kerek.», - dedi Erjan Baıtanaev.

Eske salsaq, búginde qazaqstandyqtarǵa Pfizer-men revaktsınatsııa jasaý múmkindigi usynylyp otyr.