Erjan Babaqumarov: «Táýelsizdik dáýiri» kitaby - tutas bir kezeńniń qujaty
«Meniń oıymsha, bul jaı ǵana kitap emes, bul - Qazaqstan Prezıdenti Nursultan Nazarbaevtyń ótkenge jáne bolashaqqa kózqarasy. Osy jyldary bolǵan oqıǵalarda naqty taldaý jasalǵan. Bul tek faktiler ǵana emes, bul talqylaý, tereń paıym men bizdiń Prezıdenttiń bolashaqty boljaýy. Menińshe, kitaptyń qundylyǵy bárimiz úshin aıqyn kórinip tur. Sebebi, bul týyndy bizdiń memleketimizdiń tarıhyn jasaǵan adamnyń qalamynan týyp otyr. Sol sebepti, kitap qashan da qajettiligin joǵaltpaıtyn tutas kezeńniń qujaty bolyp tabylady. Prezıdent óz jazýynda jas memlekettiń irgesin kóterý barysy álemdik oqıǵalar úrdisimen qatar júrgenin erekshe atap ótedi. Menińshe, «Táýelsizdik dáýiri» kitabynyń eń basty ereksheligi osynda», - deıdi ol.
Erjan Babaqumarovtyń aıtýynsha, Prezıdent bizdiń tarıhymyzǵa degen tolǵaýyn tereń kórsetip bergen.
«Toqsanynshy jyldary ekonomıka, saıasat, áleýmettik salada zor ózgerister bolyp, biz totalıtarlyq júıeni ysyrdyq. Naryqtyq ekonomıkanyń irgesin qaladyq. Ekinshi modernızatsııa 90-shy jáne 2010 jyldary jasaldy. Ekonomıka shuǵyl damyp, biz jańa ómir sapasyna qol jetkizdik. Jańa astananyń irgesi kóterildi. Eń bastysy - biz «Qazaqstan-2030» Strategııasynda belgilengen tapsyrmalardy ýaqytynan buryn oryndap, damyǵan elý eldiń qatarynan kórindik», - deıdi Premer-mınıstr keńsesi basshysynyń orynbasary.
Erjan Babaqumarov óz sózinde kitapta Prezıdenttiń sońǵy jyldary elimizdegi bolyp jatqan ózgeristerge naqty ári oıly baǵa bergeni ózine erekshe áser etkenin aıtady.
«Prezıdent óz kitabynda Qazaqstan damyǵan elý eldiń qataryna kirgennen keıin TOP-30 maqsaty qoıylyp otyrǵanyn atap ótedi. Alaıda 2014-2016 jyldary geosaıasat, geoekonomıka, jańa tehnologııalarǵa qatysty álemde kóp deńgeıli protsester bastalyp ketkendikten, aldyn ala esepterdi eńserip ketý múmkin bolmady. Daǵdarystarǵa tótep berý úshin «Nurly jol» baǵdarlamasy jarııalandy. Bar bolǵany úsh jylda Qazaqstan álemdik ahýaldarǵa beıimdelip, 2016 jyldyń sońynda 2017 jyldyń basynda ekonomıkalyq ósimin qalypqa keltirdi», - deıdi ol.
Erjan Babaqumarov Prezıdenttiń úshmodernızatsııasy bizdiń memlekettiń irgesin kóterý protsesin quraıtynyn jiti túsindirdi.
«Prezıdent qabyldanǵan sheshimderdiń ishki logıkasyn kórsete otyryp, sol arqyly qıyndyqtardy qalaı eńsergenin kórsetti. Máselen, dinı, ulttyq mádenı, til, ult bolashaǵyna qatysty eń ózekti suraqtarǵa kelgende kúrdeli máseleler sheshimin tapty.
Reseı-Túrkııa qarym-qatynasyn retteýdiń mán-jaıy belgili boldy. Men úshin «Táýelsizdik dáýiri» bul tek ótken jyldar týraly kitap qana emes, bizdiń eldiń bolashaqta qandaı qaǵıdattarǵa súıený kerektigin kórsetip bergen týyndy», - deıdi Erjan Babaqumarov.
Eske sala ketsek, Nursultan Nazarbaevtyń «Táýelsizdik dáýiri» atty jańa kitabynyń saltanatty tusaýkeseri bolyp ótti. Tarıhı pýblıtsıstıka janrynda jazylǵan, qazaq jáne orys tilderinde basylǵan Elbasynyń bul eńbegi elimizdiń jańa tarıhy men onyń erteńine degen avtordyń kózqarasyn tanytady.
