Erjan Babaqumarov aýrýhana basshylarymen keńes ótkizdi
ALMATY. QazAqparat – Almaty ákimi Baqytjan Saǵyntaevtyń tapsyrmasymen qala basshysynyń orynbasary Erjan Babaqumarov qalalyq ınfektsııalyq jáne provızorlyq aýrýhanalardyń bas dárigerlerimen vıdeokonferentsııa rejıminde keńes ótkizdi, dep habarlaıdy QazAqparat tilshisi.
Oǵan sondaı-aq Almaty qalasynyń memlekettik bas sanıtarlyq dárigeri Jandarbek Bekshın, Qoǵamdyq densaýlyq basqarmasynyń basshysy Tileýhan Ábildaev qatysty. Quzyrly organ basshylary COVID-19 juqtyrǵan naýqastarmen jumys isteıtin medıtsına qyzmetkerleriniń eńbek qaýipsizdigin qamtamasyz etý boıynsha qabyldanyp jatqan sharalar týraly esep berdi.
Sondaı-aq ishki ınfektsııalyq baqylaýdy kúsheıtý, epıdemııaǵa qarsy rejım standarttaryn saqtaý jáne dárigerler men medıtsına qyzmetkerleriniń eńbek qaýipsizdigi máseleleri qaraldy.
Medıtsınalyq uıymdardy jeke qorǵanys quraldarymen qamtamasyz etý, ony personaldyń durys paıdalanýyn qadaǵalaý máselesi sóz boldy.
Infektsııalyq palatalardaǵy súzgi-bokstarynyń jumysyn uıymdastyrý, mekemelerdiń bólmelerdi «taza» jáne ınfektsııalanǵan aımaqtarǵa bólý qaǵıdatyn saqtaýy, sondaı-aq jeldetý, beınebaqylaý júıeleriniń jumys isteýi, qabyldaý bólimsheleriniń «3H» (trıaj) júıesiniń jumysyn uıymdastyrý jáne basqa da máseleler tilge tıek etildi.
Almaty qalasynyń memlekettik bas sanıtarlyq dárigeri Jandarbek Bekshın medıtsınalyq uıymdar qabyldaǵan eńbek qaýipsizdigi sharalary boıynsha jaǵdaıǵa egjeı-tegjeıli taldaý jasap, baıandady.
Búginde Almatyda 1320 oryndyq 7 juqpaly statsıonar jumys isteıdi. Al provızorlyq emdeýge 1164 oryndyq 12 statsıonar belgilendi.
Almaty qalasy ákiminiń orynbasary Erjan Babaqumarov Qoǵamdyq densaýlyq basqarmasyna medıtsınalyq uıymdar men karantındik nysandardaǵy qorǵaý rejımin qamtamasyz etýdi erekshe baqylaýǵa alýdy tapsyrdy. Al Taýarlar men qyzmetterdiń sapasy men qaýipsizdigin baqylaý departamentine bul máseleni turaqty baqylaýda ustaý júkteldi.
