Erjan Babaqumarov Almatydaǵy dinı birlestik basshylarymen kezdesti
Almatyda ákimshiligi dinı birlestikter kóshbasshylaryn Rýhanı kelisim kúnimen quttyqtady.
18 qazan kúni Qazaqstan boıynsha Rýhanı kelisim kúni atalyp ótedi. Bul mereke qala turǵyndaryn ulty men dinine qaramastan biriktirýge, qoǵamdaǵy turaqtylyq men kelismidi saqtaýǵa jáne odan ári damytýǵa baǵyttalǵan.
Almaty qalasy ákiminiń orynbasary Erjan Babaqumarov qalalyq Dinı birlestik kóshbasshylary klýbynyń múshelerimen kezdesý ótkizdi. Atalǵan sharaǵa Qazaqstan musylmandary dinı basqarmasynyń, Orys pravoslav shirkeýiniń, Rım-Katolık shirkeýiniń, Evangelshil-hrıstıan baptısterdiń ókilderi qatysty.
Kezdesý barysynda rýhanı kelisim salasyndaǵy ózara baılanys, toleranttylyq pen dástúrli qundylyqtar máselesi, sondaı-aq destrýktıvti dinı ıdeologııanyń taralýyna jol bermeý maqsatynda turǵyndarmen keri baılanysty kúsheıtý máseleleri talqylandy.
Sonymen qatar, áli qaýipi seıilmegen pandemııa kezindegi halyqtyń aýyzbirshilikte bolýyna jeke toqtalyp ótti.
Óz kezeginde, klýb músheleri Rýhanı kelisim kúniniń erekshe mańyzdylyǵyn atap óte otyryp, dinı birlestikterdiń budan ári jumysyna baılanysty usynystaryn jetkizdi.
Atap aıtqanda, qalanyń bas ımamy Erkinbek Shoqaı, Voznesen kafedraldyq sobordyń klıýchary Aleksandr Sývorov jáne Almatydaǵy Qasıetti Úshtik eparhııasynyń bas vıkarıi Bednarskı ıAn Bogýmıl qatysýshylardy merekemen quttyqtap, birqatar usynysyn bildirdi.
Shara barysynda Erjan Babaqumarov qalanyń qoǵamdyq ómirine belsene aralasqan klýbtyń birqatar múshelerin quttyqtaı otyryp, qala ákimi Baqytjan Saǵyntaevtyń atynan alǵys hat tabystady.
Almaty qalasy din isteri basqarmasynyń janyndaǵy erikti konsýltatıvtik-keńesshi organ sanalatyn klýb qyzmetin 2017 jyly bastaǵan. Quramynda 30 jýyq ártúrli dinı birlestik bar.
Klýbtyń maqsaty - din salasyndaǵy ózekti máselelerdi talqylaý. Sondaı-aq, klýb músheleri Qazaqstan halqy Assambleıasynyń jumysyna qatysady jáne dinı senim bostandyǵy salasyndaǵy zańnamany jetildirý boıynsha usynys engize alady.
