Erjan Ashyqbaev: BUU Qaýipsizdik Keńesindegi tóraǵalyq - Qazaqstan dıplomatııasy úshin úlken synaq
"Bizdiń tóraǵalyǵymyz aıasynda ótetin mańyzdy sharalardyń biri - jappaı qarý-jaraqty taratpaýǵa arnalǵan taqyryptyq brıfıng. Atalǵan brıfıng 18 qańtarda uıymdastyrylady. Oǵan BUU Bas xatshysy Antonıo Gýterrestiń ózi kelip, sóz sóılemekshi. Qaýipsizdik keńesiniń basqa da turaqty jáne turaqty emes músheleri qatysady. Budan bólek, Qazaqstan ózara senim sharalaryna basymdyq jasaıdy. Sebebi búginde xalyqaralyq qaýymdastyqta, ásirese, iri derjavalar arasynda senim tapshylyǵy barynsha baıqalady. Onsyz tıimdi yntymaqtastyqty damytý múmkin emes. Sol sebepti biz aldaǵy brıfıngte atalǵan eki máselege basa nazar aýdaramyz", - dedi QR Syrtqy ister vıtse-mınıstri Erjan Ashyqbaev búgin Astanada ótken baspasóz máslıxatynda.
Josparǵa sáıkes, 19 qańtarda BUU Qaýipsizdik keńesi aıasynda mınıstrlikter pikirtalasyn uıymdastyrý josparlanǵan. Taqyryby - Ortalyq Azııa men Aýǵanstanda aımaqtyq áriptestikti damytý. Budan bólek, gýmanıtarlyq kómek berý máselesi keńinen talqylanady. Sebebi búginde álem boıynsha ondaı kómektiń kólemi azaıdy. Jalpy, Qazaqstannyń tóraǵalyǵy aıasynda 16 shara uıymdastyrylady. Sol kezde Sırııa, Irak, Sýdan, Lıvııa, Malı, Kongo, Iemen jáne Kıpr máselelerin talqyǵa salý josparlanyp otyr.
"Shyny kerek, BUU Qaýipsizdik keńesiniń tóraǵalyǵy Qazaqstan dıplomatııasy úshin úlken synaq. Bul da tájirıbe, bul da mektep. Degenmen, biz ol synaqqa daıynbyz", - dep atap kórsetti E.Ashyqbaev.
Aıta keteıik, 1 qańtardan bastap Qazaqstan tarıhta tuńǵysh ret Birikken Ulttar Uıymynyń Qaýipsizdik Keńesi Tóraǵasynyń ókilettiligin oryndaýǵa kiristi. Osyǵan oraı, Qazaqstannyń BUU janyndaǵy Turaqty ókildiginde aldaǵy jumys jospary talqylandy.
18 qańtarda jappaı qyryp-joıý qarýlaryn taratpaýǵa arnalǵan joǵary deńgeıdegi taqyryptyq brıfıng ótedi. Oǵan birqatar elderdiń basshylary men mınıstrleri qatysady. Brıfıngte Qazaqstan Prezıdenti Nursultan Nazarbaev sóz sóıleıdi degen jospar bar. Qazaqstannyń tóraǵalyǵy 31 qańtarǵa deıin jalǵasady.
