Erjan Ashyqbaev Syrtqy ister mınıstriniń birinshi orynbasary laýazymyna taǵaıyndaldy

Aqorda Erjan Ashyqbaevtyń Syrtqy ister mınıstriniń birinshi orynbasary laýazymyna taǵaıyndalǵanyn habarlady.

- Memleket basshysynyń ókimimen Erjan Nıgmatollauly Ashyqbaev Qazaqstan Respýblıkasy Syrtqy ister mınıstriniń birinshi orynbasary laýazymyna taǵaıyndaldy, - delingen qujatta.

Aıta keteıik, Erjan Nıgmatollauly 1974 jylǵy 16 maýsymda Almaty qalasynda týǵan.

1998 jyly ál-Farabı atyndaǵy Qazaq memlekettik ulttyq ýnıversıtetin, 2012 jyly Garvard ýnıversıtetiniń Dj.Kennedı atyndaǵy memlekettik basqarý mektebin támamdaǵan. Mamandyǵy — halyqaralyq qatynastar, memlekettik basqarý magıstri.

Dıplomatııalyq qyzmetin 1998 jyly QR Syrtqy ister mınıstrliginiń Tórtinshi departamentinde referent bolyp bastaǵan.

1999-2007 jyldary mınıstrliktiń ortalyq apparatynda ártúrli qyzmetter atqarǵan jáne Qazaqstannyń Belgııadaǵy elshiliginde issaparda bolǵan.

2007-2011 jyldary Syrtqy ister mınıstrliginiń Halyqaralyq aqparat komıtetiniń tóraǵasy, erekshe tapsyrmalar jónindegi elshi laýazymdaryn atqardy.

2012 jyly QR Premer-Mınıstri Keńsesi basshysynyń orynbasary, QR Úkimetiniń resmı ókili boldy.

2012-2013 jyldary QR Prezıdenti Ákimshiliginiń Syrtqy saıasat ortalyǵyn basqardy.

2013-2021 jyldary QR Syrtqy ister mınıstriniń orynbasary qyzmetin atqardy.

2021 jyldan bastap osy taǵaıyndaýǵa deıin Qazaqstan Respýblıkasynyń AQSh-taǵy Tótenshe jáne Ókiletti Elshisi boldy.

Erjan Ashyqbaev — dıplomatııalyq qyzmettiń kásibı ókili, Tótenshe jáne Ókiletti Elshi dıplomatııalyq dárejesine ıe. Aǵylshyn, túrik jáne frantsýz tilderin meńgergen.

Aıta keteıik, buǵan deıin Aqan Rahmetýllın Syrtqy ister birinshi vıtse-mınıstri qyzmetinen bosatylǵan bolatyn.