Prezıdent Ervand Tıhonovıch Ilınskııge «Qazaqstannyń Eńbek Eri» ataǵyn berdi

ASTANA.KAZINFORM – Bul týraly Aqordanyń baspasóz qyzmeti habarlady.

 -Memleket basshysy Qasym-Jomart Toqaev alpınızmdegi asa úzdik jetistikteri, sondaı-aq eldegi sportty damytýǵa qosqan eleýli úlesi jáne qoǵamdyq qyzmetke belsendi qatysqany úshin Ervand Tıhonovıch Ilınskııge «Qazaqstannyń Eńbek Eri» ataǵyn berý týraly Jarlyqqa qol qoıdy,-delingen habarlamada.

Ervand Tıhonovıch — KSRO chempıonattarynyń birneshe dúrkin chempıony jáne júldegeri, 1968 jyldan bastap KSRO sport sheberi, al 1982 jyldan bastap halyqaralyq dárejedegi sport sheberi jáne KSRO-nyń eńbek sińirgen sport sheberi. Sonymen qatar, ózge de ataqtary bar:

— 1973 jyldan beri TsSKA-nyń alpınızm boıynsha aǵa jattyqtyrýshysy.
— 1975 jyldan — Qazaq KSR-iniń eńbek sińirgen jattyqtyrýshysy.
— 1979 jyldan — KSRO-nyń eńbek sińirgen jattyqtyrýshysy.

Jattyqtyrýshylyq qyzmeti barysynda KSRO jáne Qazaqstan Respýblıkasynyń 100-den astam sport sheberin daıarlaǵan, onyń ishinde 33-i — halyqaralyq dárejedegi sport sheberi.

Qazaqstannyń alpınızm quramasynyń bas jattyqtyrýshysy — álemde alǵash bolyp planetadaǵy barlyq 14 segiz myńdyqty ottegisiz baǵyndyrǵan komanda jetekshisi.

Osyǵan deıin bilim júıesinde «Eńbek Eri» ataǵyn alǵan qansha ustaz eńbek etip jatqany týraly jazdyq.