Erulan Jamaýbaev teńge baǵamynyń nyǵaıýyna yqpal etken faktorlardy atady
ASTANA. KAZINFORM — Jyl basynan beri teńge baǵamy 1 dollar úshin 5,5 paıyzǵa nyǵaıdy. Bul týraly Úkimet otyrysynda Ulttyq bank tóraǵasynyń birinshi orynbasary Erulan Jamaýbaev aıtty.
— 2026 jylǵy 6 naýryzda Ulttyq bank bazalyq mólsherlemeni 18% deńgeıinde saqtaý týraly sheshim qabyldady. Bul sheshim altyn-valıýta operatsııalaryn teńestirýmen, eń tómen rezervtik talaptardy qaıta qaraýmen, makroprýdentsııalyq sharalardy, sondaı-aq Úkimetpen birge ınflıatsııaǵa qarsy keshendi sharalardy qabyldaýmen qatar baǵalardyń ósýin tejeýge yqpal etedi, — dedi ol.
Onyń dereginshe, jyl basynan beri teńge baǵamy 1 dollar úshin 478,2 teńgege deıin 5,5 paıyzǵa nyǵaıdy.
— Oǵan kelesideı faktorlar áser etti: jahandyq munaı naryǵynyń konıýnktýrasy; teńgedegi aktıvterdiń ınvestıtsııalyq tartymdylyǵynyń artýy jáne beırezıdentterdiń portfeldik ınvestıtsııalary kóleminiń ulǵaıýy; ekonomıkalyq agentterdiń shetel valıýtasyna degen suranysynyń tómendeýi, — dedi Erulan Jamaýbaev.
Aıta keteıik, bıyl úsh aıda taýarlar eksporty 12 mlrd dollardy qurady.
Osyǵan deıin Jamaýbaev Úkimettiń daǵdarysqa qarsy sharalary ınflıatsııanyń baıaýlaýyna yqpal etkenin aıtty.
