Erulan Jamaýbaev qarjy salasyn tsıfrlandyrýdyń nátıjelerin aıtty
Osy oraıda mınıstr bıýdjettiń jekelegen parametrlerine jáne Úkimettiń esebin talqylaý kezinde aıtylǵan mańyzdy máselelerdiń sheshimine toqtaldy.
«Transfertterdi esepke almaǵanda kirister boıynsha jospar 22 mlrd teńgege artyǵymen oryndaldy. Bıýdjetke 6,6 trln teńge tústi. Salyq túsimderi 5 trln 576 mlrd. teńgeni qurap, jospar 100,3 paıyzǵa oryndaldy. Salyqtar boıynsha asyra oryndaýdyń negizgi somasy korporatıvtik tabys salyǵy, paıdaly qazbalardy óndirý salyǵy jáne shıki munaıǵa salynatyn eksporttyq kedendik bajǵa tıesili. Sonymen qatar, jospar qosylǵan qun salyǵy boıynsha 256 mlrd teńgege atqarylmaǵan. Bul qosylǵan qun salyǵyn qaıtarýdyń ósýine, taýar aınalymynyń kúrt azaıýyna jáne eldiń syrtqy saýdasynyń tómendeýine baılanysty boldy», - dedi E. Jamaýbaev.
Onyń aıtýynsha, koronavırýs daǵdarysy jaǵdaıynda Ulttyq qordan transfertter tartýdyń óskeni oryn aldy, onyń kólemi bıýdjet kiristeriniń 45 paıyzyn qurady. Bul rette qosymsha somany esepke almaǵanda, bıýdjet kiristeriniń quramyndaǵy transfertterdiń úlesi ótken jyldar deńgeıinde saqtaldy.
«Árıne, shıkizattyq emes kiristerdiń jańa kózderin izdeý men fıskaldyq ákimshilendirýdi jaqsartýdyń mańyzdylyǵyn túsinemiz. Osyǵan oraı kóleńkeli ekonomıkany qysqartý men salyqtyq jáne kedendik ákimshilendirýdi tsıfrlandyrý boıynsha keshendi jumystar júrgizilip jatyr. Kameraldyq baqylaý tıimdiliginiń 1,5 esege ósýi qamtamasyz etildi, osyǵan baılanysty sýbektiler 490 mlrd teńgeni tekserýge shyqpaı bıýdjetke ózderi tóledi. Bul rette, daǵdarysqa qarsy sharalar aıasynda shaǵyn jáne orta bızneske qatysty salyqtyq baqylaý sharalary 6 aıǵa toqtatyldy. Osyǵan qaramastan, ákimshilendirýdi jaqsartý esebinen, tsıfrlandyrýdyń arqasynda biz 700 mlrd teńgeden asa bıýdjetke qosymsha túsimderge qol jetkizdik», - dedi mınıstr.
